चिकित्सक र स्वास्थ्यकर्मीले गरे सुरक्षाको माग

नेपाल चिकित्सक संघले चिकित्सक तथा स्वास्थ्यकर्मीको सुरक्षाका लागि देशभरका स्वास्थ्य संस्था तथा अस्पतालमा सुरक्षाको व्यवस्था गर्न माग गरेको छ।

चिकित्सक तथा स्वास्थ्यकर्मीमाथि गालीगलौज, हातपात तथा अस्पताल भवन नै तोडफोड जस्ता घटना बढेको उल्लेख गर्दै संघले उपप्रधानमन्त्री तथा गृहमन्त्री नारायणकाजी श्रेष्ठलाई सुरक्षाको प्रत्याभूति गर्न माग गर्दै ज्ञापनपत्र बुझाएको हो।

चिकित्सक संघले भनेको छ, “स्वास्थ्यकर्मी तथा स्वास्थ्य संस्थाको सुरक्षा सम्बन्धी (पहिलो) संशोधन ऐन २०७९ का सम्बन्धमा देशभरका सुरक्षा निकाय तथा न्यायिक एव अर्धन्यायिक निकाय अनभिज्ञ हुनु अत्यन्तै चिन्ताको विषय बनेको छ। राज्यको तर्फबाट तर्जुमा गरिएका ऐन, कानून बमोजिम चिकित्सक तथा स्वास्थ्यकर्मी सुरक्षित तवरले स्वास्थ्य सेवा प्रवाहमा समर्पित हुने उचित वातावरण सिर्जना गरिदिन अनुरोध गर्दछौं।”

ज्ञापनपत्रमा नेपाल मेडिकल कलेज अत्तरखेल जोरपाटीमा चिकित्सक तथा स्वास्थ्यकर्मीमाथि अभद्र व्यवहार भएको उल्लेख गर्दै संघले आपत्ति जनाएको छ। गत मंगलबार उपचारका क्रममा भएको घटनालाई लिएर बिरामीका आफन्तले अस्पतालमा तोडफोड तथा चिकित्सक र स्वास्थ्यकर्मीलाई गालीगलौज गरी अभद्र व्यवहार गरिएको घटनाका सम्बन्धमा गृहमन्त्री श्रेष्ठको ध्यानाकर्षण गराएको छ।

यस्तै, अन्य अस्पतालमा भएका घटनाप्रति समेत संघले ध्यानाकर्षण गराएको छ। संघका अध्यक्ष डा. अनिलविक्रम कार्कीले भने, “नारायणी अस्पताल वीरगन्ज, सिन्धुली अस्पताल, सिरहा अस्पताल लगायत देशका विभिन्न ठाउँमा चिकित्सक तथा स्वास्थ्यकर्मीलाई लक्षित गरी गालीगलौज, हातपात तथा अस्पताल भवन नै तोडफोड भएका घटनाक्रमले देशभरका चिकित्सक तथा स्वास्थ्यकर्मीले असुरक्षित महसूस गरेको अवस्था छ।”

उपचार प्रक्रियामा चित्त नबुझेका अवस्थामा कानूनी बाटो अवलम्बन गर्नुभन्दा अस्पताल तोडफोड र अभद्र व्यवहार गर्ने क्रम बढेको उल्लेख गर्दै संघले आपत्ति जनाएको छ।