सन्दीप सहित राष्ट्रिय क्रिकेट टोलीको घोषणा

बलात्कारको अभियोग लागेका सन्दीप लामिछाने सहित राष्ट्रिय क्रिकेट टोलीको घोषणा गरिएको छ।

नेपाल क्रिकेट संघ (क्यान) त्रिदेशीय श्रृंखलाका लागि बिहीबार साँझ राष्ट्रिय टोलीको घोषणा गरेको हो। लामिछानेमाथि बालिका बलात्कार अभियोग लागेको छ। उनी केही दिनअघि मात्रै पुर्पक्षका लागि २० लाख धरौटीमा रिहा भएका थिए।

रोहित पौडेलको नेतृत्वमा रहेको राष्ट्रिय टोलीमा कुशल भुर्तेल, आशिफ शेख, ज्ञानेन्द्र मल्ल, कुशल मल्ल, दीपेन्द्रसिंह ऐरी, सुदीप जोरा, सोमपाल कामी, करण केसी, सन्दीप लामिछाने, गुल्सन झा, भीम सार्की र सूर्य तामाङ छन्।

त्यस्तै, आरिफ शेख, प्रतिश जीसी, श्याम ढकाल र अर्जुन साउँदलाई बैकल्पिक खेलाडीमा राखेको छ। नवनियुक्त प्रमुख प्रशिक्षक मोन्टी देशाईले बन्दप्रशक्षिणमा रहेका २० खेलाडीमध्ये १६ जनालाई राष्ट्रिय टोलीमा समेटेका हुन्।

नेपालको अर्को साता कीर्तिपुरस्थित त्रिवि क्रिकेट मैदानमा नामिबिया र स्कटल्यान्डसँग त्रिदेशीय श्रृंखला खेल्दै छ। आईसीसी विश्वकप लिग २ अन्तर्गत प्रतियोगिता हुन लागेको हो।