समाचारशुक्रवार, आश्विन २६, २०७५

काठमाडौंमा हेटौंडाका खसीबोका र मुस्ताङका च्याङ्ग्रा

हिमालखबर

नेपाल खाद्य संस्थानले आजबाट खसीबोका र च्याङ्ग्राको बिक्री शुरु गरेको छ ।

दशैंका लागि मुस्ताङबाट पोखरा र काठमाडौंतर्फ बिक्री गर्न लैजाँदै गरेका भेडा च्याङ्ग्रा । तस्वीरः रासस

पहिलो चरणमा ५५० च्याङ्ग्रा र २५० खसीबोका ल्याएर बिक्री शुरु गरिएको संस्थानका सूचना अधिकारी शंकर सापकोटाले जानकारी दिए ।

यो वर्ष संस्थानले च्याङ्ग्रा मुस्ताङबाट ल्याएको छ भने खसीबोका हेटौंडाबाट ल्याएको छ ।

आजदेखि हरेकदिन बिहान ८ देखि बेलुका ६ बजेसम्म खसीबोका र च्याङ्ग्राको बिक्री गरिने सापकोटाले बताए ।

यो वर्ष एक हजार च्याङ्ग्रा र एक हजार खसीबोका बिक्री गर्ने लक्ष्य संस्थानको छ । खसीबोकाभन्दा तुलनात्मक रुपमा च्याङ्ग्रा महंगो भएपनि ग्राहकको आकर्षण बढी भएको सापकोटाको भनाइ छ ।

अहिले काठमाडौंका अन्य बजारमा जिउँदो खसीबोका प्रतिकिलो ५३५ रुपैयाँ हाराहारीमा बिक्री भइरहेको छ भने खाद्य संस्थानले खसीबोका प्रतिकिलो ५१० र च्याङ्ग्राको भाउ ७१० तोकेको छ ।

त्यसमा पनि १० रुपैयाँ छुट दिएर ५०० र ७०० को दरमा बिक्री भइरहेको सापकोटाले जानकारी दिए ।

आज बिहानैदेखि खाद्य संस्थानमा च्याङ्ग्रा र खसीबोका किन्ने ग्राहकको भिड लागेको छ ।

 

प्रतिकृया दिनुहोस