खेलकुदबुधवार, आश्विन १७, २०७५

नेपाल र म्यानमार विश्व टी–२० छनोटकाे पहिलाे खेल खेल्दै

हिमालखबर

आइसिसी विश्व टी–२० क्रिकेटअन्तर्गत एसिया छनोटका लागि आज नेपाल र म्यानमारबीच खेल हुँदैछ। खेल दिउँसो १२ बजे मलेसियाको राजधानी क्वालालम्पुरस्थित किनरारा ओभल मैदानमा हुनेछ।

नेपालको राष्ट्रिय टोलीले सन् २००६ पछि म्यानमारसँग खेल्न लागेको हो। सन् २००६ को एसिसी ट्रफीमा नेपालले म्यानमारलाई १० विकेटले पराजित गरेको थियो। छनोटमा नेपालले सहभागी टीमहरु म्यानमारका साथै आयोजक मलेसिया, भूटान, सिङ्गापुर, चीन, र थाइल्याण्डसँग प्रतिस्पर्धा गर्नेछ। खेल २६ असोजसम्म चल्नेछ। राउन्ड रोबिनको आधारमा हुने सो प्रतिस्पर्धाबाट शीर्ष तीन टोली दोस्रो चरणका लागि छनोट हुनेछन्।

यसअघि एशियाको पश्चिम क्षेत्रीय छनोटबाट यूएई, कतार र कुवेत दोस्रो चरणमा प्रवेश गरिसकेका छन्। दोस्रो चरणमा यूएई, कतार र कुवेतसँगै पूर्व क्षेत्रबाट छनोट हुने तीन टोली गरी छ टोलीबीच प्रतिस्पर्धा हुनेछ। छ टोलीबीचको प्रतिस्पर्धाबाट दुई शीर्ष टोली अन्तिम चरणका लागि छनोट हुनेछन्। अन्तिम चरणमा विश्वभरबाट छानिएका १४ टोलीबीच प्रतिस्पर्धा हुनेछ भने १४ मध्ये ६ टोली टी–२० विश्वकप २०२० का लागि छनोट हुनेछन्।

नेपाली टोलीमा पारस खड्का (कप्तान), अनिलकुमार साह, वसन्त रेग्मी, विनोद भण्डारी, दीपेन्द्रसिंह ऐरी, ज्ञानेन्द्र मल्ल, करण केसी, ललितसिंह भण्डारी, ललित राजवंशी, आरिफ शेख, प्रदीप ऐरी, सन्दीप लामिछाने, शरद भेषवाकर, सोमपाल कामी तथा वैकल्पिक खेलाडीमा सुनील धमला, साहब अलाम, दीपेश श्रेष्ठ र सागर पुन छन्। मुख्य प्रशिक्षकमा जगत टमाटा, फिजियोमा दिनेश भट्ट र व्यवस्थापकमा रमन शिवाकोटी छन्। छनोट प्रतियोगिताअन्तर्गत नेपालले दोस्रो खेल यही २० असोजमा मलेसिया, २१ मा  थाइल्याण्ड, २३ मा भूटान, २४ मा चीन र २६ मा सिङ्गापुरसँग खेल्नेछ। सन् २०२० मा अस्ट्रेलियामा हुने टी–२० विश्वकप क्रिकेटको पहिलो चरणको छनोट प्रतियोगितामा सहभागी हुन नेपाली टोली यही १५ असोजमा मलेसिया गएको हो ।  रासस

 

प्रतिकृया दिनुहोस