समाचारसोमबार, ४ मंसिर , २०७४

मतदाताको दुःख– भोट हाल्न एकरात बास बस्नुपर्ने

हिमालखबर

म्याग्दीको धौलागिरि गाउँपालिका–४ का बासिन्दालाई मतदान गर्न एकरात बास बस्नुपर्ने बाध्यता रहेको छ ।

प्रदेश (ख) अन्तर्गत पर्ने धौलागिरि गाउँपालिका–४ को सिम्कोश, बगर र नाउराका बासिन्दा मतदानकै दिन पुग्न नसकिने भएकाले अघिल्लो दिन नै पुगेर बास बस्नुपर्ने बाध्यता भएको हो ।

म्याग्दीको दुर्गम क्षेत्रमा पर्ने बगरमा ३४, सिम्कोश र नाउरामा १०÷१० घरपरिवार बसोबास गर्छन् ।

यी तीन गाउँको लागि चन्द्रज्योति मावि खिवाङमा मतदान केन्द्र तोकिएको छ ।

सिम्कोश, बगर र नाउरा गाउँबाट हिँडेर खिवाङ पुग्न करीब आठ घण्टा लाग्छ ।

तीन वटा गाउँमा २०० जना मतदाता छन् ।

केन्द्र टाढा भएकाले ज्येष्ठ नागरिक र अशक्त मतदान गर्नबाट बञ्चित हुने गरेको बगरका स्थानीयवासी चित्रबहादुर तिलिजाले जानकारी दिए ।

विकट भएकाले उम्मेदवारसमेत गाउँमा भोट माग्न पुग्दैनन् ।

उम्मेदवारलाई नदेखेरै मतदान गर्नुपरेको स्थानीयवासी नरप्रसाद पुनले गुनासो गरे ।

स्थानीयवासीले गाउँका अगुवाले गर्ने निर्देशनको भरमा मतदान गर्ने गरेको पुनले बताए ।

बगर गाउँ धौलागिरि हिमाल आरोहणका लागि जाने धौलागिरि पदमार्गको अन्तिम बस्ती हो । रासस

प्रतिकृया दिनुहोस