समाचारबुधबार, ७ आषाढ , २०७४

पर्सामा विकास बजेट खर्च भएन, ठूलो रकम फ्रिज हुने

हिमालखबर

चालु आर्थिक वर्ष सकिन २३ दिन बाँकी छँदा पर्सा जिल्लामा विकास बजेटको झण्डै ५८ प्रतिशत रकम खर्च हुन बाँकी रहेको छ ।

आर्थिक वर्ष २०७३/०७४ को अन्तिम महिना असारको पहिलो साता विति सक्दा पनि पर्सा जिल्लामा पूँजिगत बजेटतर्फ जम्मा ४२.४२ प्रतिशतमात्रै खर्च भएको कोष तथा लेखा नियन्त्रक कार्यालय पर्साका प्रवक्ता नारायणलाल श्रेष्ठले जानकारी दिए ।

उनले भने, “यस जिल्लाका लागि आएको कुल बजेटमध्ये पूँजिगत बजेटतर्फको रु २ अर्ब ३३ करोड ७७ लाख ९५ हजार खर्च हुन सकेको छैन ।

त्यसैगरी चालुतर्फ रु ८४ करोड ९३ लाख ५१ हजार खर्च हुन बाँकी छ ।

यस आर्थिक वर्षका लागि चालु र पूँजीगत गरी रु कुल ९ अर्ब ९६ करोड ४८ लाख ७३ हजार पर्साका लागि विनियोजन भएको थियो । जसमध्ये चालु र पूँजीगत दुबैतर्फको खर्च गरी रु ३ अर्ब १८ करोड ७१ लाख ४७ हजार अझै खर्च हुन बाँकी रहेको श्रेष्ठले बताए ।

जिल्लामापूँजिगततर्फ ४ अर्ब ६ करोड ३ लाख ४५ हजार रुपैयाँ बजेट विनियोजन भएकोमा असारको पहिलो सातासम्ममा ४२.४२ प्रतिशतअर्थात १ अर्ब ७२ करोड २५ लाख ४९ हजार रुपैयाँमात्रै निकासा भएको हो ।

गत आर्थिक वर्षमा मात्रै पूँजीगततर्फको विकास बजेट खर्च हुन नसक्दा ३१.०६ प्रतिशत अर्थात झण्डै रु ८५ करोड ७८ लाख ४४ हजार ‘फ्रिज’ भएको थियो । तर यसवर्ष भने यो संख्या लगभग दोब्बरले बढ्ने तथ्याङ्कले देखाउँछ ।

पर्सा जिल्लामा बसैभन्दा बढी शहरी विकास तथा भवन निर्माण डिभिजन कार्यालयको बजेट खर्च हुन सकेको छैन् । रु १ अर्ब ९२ करोड १५ लाख ११ हजार विनियोजन भएकोमा हालसम्म रु १९ करोड १४ लाख ३७ हजारमात्रै खर्च भएको छ ।

यस सन्दर्भमा डिभिजन प्रमुख सरोज कुमार गोईतले सरकार परिवर्तनसँगै विभागीय प्रमुखको अदलाबदलीले विकासे बजेटको रकम खर्च हुन नसकेको बताए ।

उनले सरकारले तयारी विनाको बजेट पठाएकाले पनि खर्च हुन नसकेको दाबी गरे ।

सरकारले यसै वर्षदेखि लागू गरेको जनता आवास कार्यक्रम र वीरगंज महानगरपालिकाभित्र भवन निर्माण लगायतका कामका लागि ठूलो रकम विनियोजन गरेको थियो । तर उक्त शीर्षक अन्तर्गत हालसम्म कुनै पनि काम शुरु भएको छैन ।

तराईको लाईफ लाईनको रुपमा चिनिने हुलाकी सडक परियोजनाका लागि पूँजीगततर्फ रु २० करोड ४६ लाख ७५ हजार विनियोजन गरिएकोमा हालसम्म १८.४९ प्रतिशत अथार्त रु ३ करोड ७८ लाख ९ हजार मात्रै खर्च भएको छ ।

यसैगरी नारायणी सिँचाई व्यवस्थापन डिभिजन नं. ५ कार्यालयका लागि रु २६ करोड ७८ लाख ९९ हजार विनियोजन भएकोमा हालसम्म ६१.०३ प्रतिशतमात्रै खर्च भएको छ ।

पूँजीगत बाहेकका चालु बजेटका लागि समेत पर्सा जिल्लामा थुप्रै कार्यालयहरुले आफ्ना योजनाहरुलाई तिब्रता दिएका छैनन् ।

चालु तर्फ जिल्ला शिक्षा कार्यालयको रु २२ करोड १७ लाख ८३ हजार, जिल्ला समन्वय समिति कार्यालयको रु १६ करोड ४८ लाख ३३ हजार, यसैगरी जिल्ला कृषिविकास कार्यालयको रु ५ करोड ३५ लाख ८३ हजार, जिल्ला जनस्वास्थ्य कार्यालयको रु ४ करोड ६ लाख ४६ हजार, पर्सा बन्यजन्तु आरक्ष कार्यालयको रु ३ करोड ८१ लाख ८ हजार, नरायणी उप–क्षेत्रिय अस्पतालको रु ३ करोड १६ लाख १६ हजार, जिल्ला वन कार्यालयको रु २ करोड ७ लाख ३ हजार, जिल्ला पशु सेवा कार्यालयको रु १ करोड ३९ लाख११ हजार र शहरी विकास तथाभवननिर्माण डिभिजन कार्यालयको १ करोड ३३ लाख ४३ हजार रुपैया खर्च हुन बाँकी रहेको कोष तथा लेखा नियन्त्रक कार्यालयले जनाएको छ ।

सरकारले यस आर्थिक वर्षमा विकासे बजेट ८० प्रतिशत सम्म खर्च गर्ने योजना बनाए पनि तराईका जिल्लाहरुमा कार्यान्वयन हुन सकेको छैन ।
जियालाल साह, वीरगञ्ज

प्रतिकृया दिनुहोस