थप समाचारमंगलवार, पौष १९, २०७३

एमालेद्वारा सर्वोच्चको निर्णयको स्वागत, संसदको अवरोध हटाउने बारे छलफल गर्ने

हिमालखबर


नेकपा (एमाले) स्थायी कमिटीको आजको बैठकले संविधान संशोधनसम्बन्धी सर्वोच्च अदालतको १८ पुस, सोमबारको निर्णय स्वागतयोग्य भएको जनाएको छ ।

एमाले अध्यक्ष केपी शर्मा ओली निवास बालकोटमा बसेको बैठकले संसद्को अवरोध हटाउने विषयमा सत्तारुढ दलसँगको छलफललाई निरन्तरता दिने निर्णय गरेको छ । संविधान संशोधन प्रस्ताव प्रतिकूल हुने गरी अदालतले फैसला गरेको एमाले उपाध्यक्ष वामदेव गौतमले दाबी गरे ।

उनले भने,  “सीमाङ्कनबाहेक सबै विषय संसद्को अधिकारमा पर्ने भएकाले सत्तारुढ दललाई संशोधन विधेयक फिर्ता लिन आग्रह गर्ने निर्णय भएको छ ।”

बैठकले सीमाङ्कनको हेरफेरसम्बन्धी विषय प्रदेशसभाको विषय भएकाले प्रदेशसभाले निर्णय नगरी सीमाङ्कनको निर्णय संसद्ले गर्न नमिल्ने निर्णय गरेको  गौतमले बताए  ।

“सरकारले पहाड र मधेश अलग गरी देशलाई बर्बाद गर्नेखालको प्रस्ताव ल्याएकाले संसद् अवरोध हटाएर सत्तारुढ दलसँग छलफल गरी अगाडि बढ्ने निर्णय भएको छ,” गौतमले भने ।

उनले  संशोधन प्रस्ताव दर्ता गर्ने दल र सरकारले तराई र पहाडलाई अलग गर्नुपर्ने कारणको जवाफ दिनुपर्नेमा जोड दिए ।

यही २२ पुसमा एमालेले गर्ने  जनप्रदर्शनलाई सशक्त, व्यवस्थित र मर्यादित बनाउने विषयमा समेत बैठकमा छलफल भएको  छ ।

 
 

प्रतिकृया दिनुहोस