'रेस ३' खेल्नु अघि सबैले बेवास्ता गरे: बबी देओल

बलिउड अभिनेता बबी देओलले आफ्नो कठिन परिस्थितिमा कसैले पनि आफूसँग काम गर्न रुचि नदेखाएको बताएका छन् । तर, 'रेस ३' मा सलमान खानले मौका दिएपछि उनको फिल्मी करिअरले नयाँ बाटो समात्यो । बबीका अनुसार उक्त फिल्मको व्यावसायिक सफलताले उनलाई नयाँ शुरुवात गर्ने अवसर दियो ।

उनले भने, "मलाई लाग्छ, 'रेस ३' पछि मैले आफ्नो आसपास र भेट हुने मानिसहरुमा सकारात्मकता महसूस गरेको छु । यो ऊर्जा कायम रहोस् भन्ने मेरो चाहना छ ।"

'रेस ३' मा खेल्नु अघि अधिकांश समय घरमै बस्ने उनी उक्त फिल्मको सफलतापछि भने अरु फिल्मको प्रस्ताव आएर काम गरिरहेका छन् । उनी अभिनीत 'यमला पगला दीवाना फिर से' ३१ अगस्टमा प्रदर्शनमा आउँदै छ ।

उनका अनुसार 'रेस ३' अघि उनले आफ्नो करिअरमा मद्दत गर्न आग्रह गर्दै धेरै मानिस र ट्यालेन्ट म्यानेजमेन्ट कम्पनीसम्म पुगे । तर, कसैले पनि उनका कुरा सुनेनन् । उनले भने, "म खुशी छु, अब मसँग मेरो काम व्यवस्थापन गर्ने टिम छ ।"

उनले अगाडि थपे, "यदि अभिनेताका रुपमा मेरो काम राम्रो भएमा मानिसहरुले मलाई ध्यान दिनेछन् । फिल्म सफल वा असफल हुने क्रम त चलिरहन्छ, तर राम्रो काम गरेमा तारिफ पाइन्छ । जुन कुरा मैले पछिल्लो समय पाएँ ।"

बबी अहिले साजिद नाडियाडवालाको कमेडी फिल्म 'हाउसफुल ४' को सुटिङ गर्ने तयारीमा छन् । - एजेन्सी

कला

'रेस ३' खेल्नु अघि सबैले बेवास्ता गरे: बबी देओल

हिमालखबर सोमबार, भदौ ११, २०७५