यस्ता छन्, बलिउडमा जमेका ५ पाकिस्तानी कलाकार

नयाँ दिल्ली (एजेन्सी)– भारत र पाकिस्तानबीच सीमा विवादलाई लिएर अझै विवाद मत्थर भएको छैन। तर, पाकिस्तानी नायिकाले भने भारतीय सिनेमा उद्योग बलिउडमा आफ्नो प्रतिभाले तहल्का पिटेका छन्।

बलिउडमा नाम र दाम दुबै कमाउने ५ पाकिस्तानी नायिकाहरूको नाम यस प्रकार छ।

माहिरा खान

पाकिस्तानी सुन्दरी माहिरा खानले बलिउडका बादशाह शाहरुख खानसँग ‘रईस’ फिल्ममार्फत डेव्यु गरेकी थिइन। यो फिल्म निकै सफल भएको थियो र उनको अभिनयलाई सबैले स्विकार गरेका थिए। पहिलो फिल्मबाटै बलिउडमा लोकप्रियता कमाएकी माहिराले कान फिल्म फेस्टिवलमा पाकिस्तानबाट रेड कार्पेटमा आफ्नो हुनर देखाउने मौका पाएकी थिइन।

सबा कमर जमा

सबाले बलिउडका अर्का खारिएका अभिनेता इरफान खानसँग ‘हिन्दी मिडियम’ मा काम गरेकी थिइन। यही फिल्मबाट उनको विश्वभरी पहिचान भएको थियो। हिन्दी फिल्म खेलेका कारण उनी पाकिस्तानको सबैभन्दा बढी पारिश्रमिक लिने नायिका पनि बन्न पुगिन। उनी यसअघि पाकिस्तानमा टिभी अभिनेत्रीको रूपमा परिचित थिइन। साबालाई लक्स स्टायल अवार्ड, हम अवार्ड र फिल्मफेयर अवार्डमा मनोनित गरिएको थियो।

मावरा होकेन

पाकिस्तानी अभिनेत्री मारवा होकेनले पनि बलिउडसँग जोडिएपछि अन्तर्राष्ट्रिय पहिचान बनाएकी थिइन। मारवा पाकिस्तानको चर्चित मोडल हुन्। उनले बलिउडमा ‘सनम तेरी कसम’ फिल्ममा काम गरेकी थिइन।

हुमैमा मलिक

हुमैमा पाकिस्तानको ‘बोल्ड’ अभिनेत्रीमा समावेश छिन्। उनको फोटो सुटले पाकिस्तानमा हंगामा हुने गरेको छ। बलिउडमा उनले इमरान हासमीसँग ‘राजा नटवरलाल’ बाट डेव्यु गरेका थिए।

मिसा शफी

बलिउडमा प्रवेश गरेपछि पाकिस्तानी अभिनेत्री मिसा शफीको करिअर माथि उठेको थियो। उनले २०१३ मा रिलिज भएको ‘भाग मिल्खा भाग’ मा काम गरेकी थिइन। फिल्मको मुख्य रोलमा फरहान अख्तर थिए।