‘लिग नहुँदा राष्ट्रिय टीम कमजोर’
दुई दशकदेखि मनाङ मस्र्याङ्दी क्लबलाई प्रशिक्षण दिइरहेका छिरिङ लोप्साङले पहिलो पटक राष्ट्रिय टोली यू–१८ को कमान समाल्ने मौका पाएका थिए, यहि वर्ष । ११ असोजमा यू–१८ साफ च्याम्पियनसिपको उपाधि भित्र्याएपछि एएफसी यू–१९ च्याम्पियनसिप छनोटको तयारीमा जुटेका प्रशिक्षक लोप्साङ भन्छन्, “देशको प्रतिनिधित्व गर्दा गौरव त महसूस हुन्छ नै ठूलो भारी बोकेजस्तो हुँदोरहेछ।”
भूटानसँग हार्यौं, भारतलाई हराएर उपाधि जित्यौं । युवा टोली बलियो भएको हो कि अरु कमजोर भएका हुन् ?
भूटानसँगको हारलाई लिएर युवा टोली कमजोर छ कि भनेर शंका गरिएको होला । त्यो खेलमा हामीले ५/६ गोल गर्नुपर्थ्यो, चुक्यौं । फूटबलमा यस्तो भइरहन्छ । तर, हामी भन्दा बलिया देशलाई पनि हरायौं । कमजोर भए त उपाधि जित्ने थिएनौं । हाम्रो युवा टोलीमा सुधार आएको छ, विगतको भन्दा बलियो छ ।
यस्तै एक–दुई प्रतियोगिता जित्दा राष्ट्रिय टोलीको पनि खूब प्रशंसा गरिएको थियो, अहिले त हालत देखियो नि !
जुन रुपमा हामीले प्रगति गर्नुपथ्र्यो, भएन । हामीसँगैका अरु देशले धेरै प्रगति गरिसकेका छन् । राष्ट्रिय टोली कमजोर नै छ । प्रशंसा अनुरुप काम पनि गर्नुपर्छ । त्यसका लागि एक–डेढ महीनाको प्रशिक्षणले कुनै पनि टोली बलियो हुँदैन, नियमित प्रशिक्षण हुनुपर्छ ।
लिग प्रतियोगिता नहुँदा कति फरक परेको छ ?
फूटबलको मेरुदण्ड भनेकै लिग प्रतियोगिता हो । लिगमा नयाँ खेलाडी आउने र पुरानाले आफूलाई सुधार्ने मौका पाउँछन् । राष्ट्रिय टोली कमजोर हुनुको पहिलो कारण लिग प्रतियोगिता नहुनु हो । लिग नहुँदा नयाँ खेलाडी आउन पनि सकेनन् । स्थिति यस्तै रहे अब राष्ट्रिय टोलीमा खेलाडी अभाव हुन्छ । यसले झन् कमजोर बनाउँछ । लिग प्रतियोगिता नगरी नहुने भइसकेको छ ।
युवा टोलीमा एन्फा एकेडेमीको उत्पादनले कत्तिको भरथेग गरेको छ ?
एन्फा एकेडेमीमा रहने भनेको १५ वर्षसम्म मात्रै हो । त्यसपछि आफैं खेल्छन् । अहिलेको युवा टोलीमा पनि बाहिरकै खेलाडी धेरै छन् । त्यहाँबाट आएका पनि दुई वर्ष त अन्य क्लबहरुमा आफैं खेलेर बसेका छन् । त्यसैले युवा टोलीमा एन्फाको भरथेग भन्न गाह्रो छ । यो टोलीका खेलाडीहरु गत जेठमा भएको ललित स्मृति यू–१८ प्रतियोगिताबाट छानिएका हुन् ।
युवा टोलीबाट कत्तिको आशावादी हुनुहुन्छ ?
यू–१८ साफ च्याम्पियनसिप खेलेको टोली नै ७–२२, कात्तिकमा यू–१९ एएफसी च्याम्पियनसिप छनोट प्रतियोगिता खेल्दैछ । घाइते भएका तीन/चार जना फेरबदल होलान् । २२ असोजदेखि बन्द प्रशिक्षण शुरु गर्छौं । हाम्रो समूहका अन्य देशहरु प्राविधिक रुपमा पनि बलिया छन् । दशैंका बेला यू–१८ टोलीको तर्फबाट साफ च्याम्पियनसिपको उपाधि उपहार भयो । अर्को उपहारको आशा त गर्नै प¥यो नि !
-1732261651.jpg)
-1732259528.jpg)
