कर्तव्य ज्यान मुद्दाका फरार अभियुक्त साढे ८ वर्षपछि पक्राउ
कर्तव्य ज्यान मुद्दामा फरार रहेका रुकुमपूर्वका चार जना साढे ८ वर्षपछि पक्राउ परेका छन्। उनीहरु चारै जनालाई शुक्रबार भुमे गाउँपालिका–४ को काँडास्थित आफ्नै घरबाट पक्राउ गरिएको हो।
पक्राउ पर्नेहरुमा भुमे गाउँपालिका–४ काँडाका श्रीमान् भनिने ३१ वर्षीय समर्पन बुढा, बने भनिने २९ वर्षका ओमप्रकाश घर्ती, गजित भनिने ३५ वर्षका आकाश बुढा र ३२ वर्षका दीपक घर्ती रहेको जिल्ला प्रहरी कार्यालय रुकुमपूर्वले जनाएको छ। कर्तव्य ज्यान मुद्दामा पक्राउ परेका उनीहरुमाथि २०६७ सालमा मुद्दा दर्ता भएको थियो।
साविकको सिङ्गो रुकुम जिल्ला हुँदा रुकुम जिल्ला अदालत खलङ्गाले उनीहरुलाई २०६८ सालमा कैद सजाय र जरिवाना सुनाएको थियो। रुकुम जिल्ला अदालतले समर्पनलाई पाँच महीना २१ दिन, ओमप्रकाश र आकाशलाई पाँच महीना २२ दिन र दीपकलाई पाँच महीना २४ दिन कैद र जनही रु.२०/२० जरिवाना तोकेको थियो।
त्यतिबेला फरार भएका उनीहरुलाई लामो समयपछि प्रहरीको विशेष टोली परिचालन गरी पक्राउ गरेको जिल्ला प्रहरी कार्यालय रुकुमपूर्वका प्रहरी निरीक्षक तथा सूचना अधिकारी वीरबहादुर सुनारले बताए। उनका अनुसार शुक्रबार पक्राउ परेका उनीहरुमध्ये श्रीमान् भनिने समर्पन बुढालाई शुक्रबार रुकुमपश्चिम कारागारमा पठाइएको छ।
बाँकी तीन जनालाई आइतबार कारागार चलानका लागि जिल्ला कारागार रुकुमपश्चिममा पठाइने बताइएको छ।
-1732261651.jpg)
-1732259528.jpg)