ओलाङचुङगोला लोकमार्गको निर्माण दुवैतर्फबाट अघि बढ्यो
ताप्लेजुङको ओलाङचुङगोला हुँदै चीनको तिब्बत जोड्ने उत्तर–दक्षिण ओलाङचुङगोला लोकमार्ग निर्माण कार्य दुवैतर्फबाट अघि बढेको छ । लोकमार्ग निर्माणको जिम्मा पाएको एसडी एलाइट जेभी निर्माण कम्पनीले दुवैतर्फबाट निर्माण कार्य अघि बढाएको हो ।
उत्तर–दक्षिण ओलाङचुङगोला लोकमार्ग अन्तर्गत ओलाङचुङगोलादेखि लेलेपतर्फ चीनको प्राविधिक सहयोगमा निर्माण भइरहेको ट्रयाकको अवलोकनका लागि आएका तिब्बतका प्रतिनिधिलगायत । तस्बीर : रासस
गत १२ असोजदेखि चीनको तिब्बतबाट भाडामा ल्याइएका चारवटा मेसिनमार्फत ओलाङचुङगोला बस्तीदेखि लेलेपतर्फको भागमा झण्डै डेढ किलोमिटर ट्र्याक खोलिसकिएको छ । एलाइटले फक्ताङलुङ गाउँपालिकासँग समन्वय गरी तिब्बतबाट मेसिन औजारसहित जनशक्ति भाडामा ल्याएर काम अघि बढाएको हो ।
यता सदरमुकाम तर्फबाट लेलेपको लुङथुङसम्म ट्र्याक खोलिसकिएको छ भने दशैँ बिदामा निस्किएका कामदारसमेत फर्किएर काम शुरु गर्ने तयारीमा रहेको एलाइट कम्पनीका प्रतिनिधि राजीव लामिछानेले जानकारी दिए । पाँचवटा ठूला मेसिन लगाएर काम गरिरहेको उनको भनाइ छ ।
लामिछानेका अनुसार दुवैतर्फबाट काम अघि बढेकाले एक वर्षभित्रै ओलाङचुङगोला सदरमुकाम फुङलिङसँग सडक सञ्जालले जोडिनेछ । जतिसक्दो चाँडो निर्माण सम्पन्न गर्ने गरी काम भइरहे पनि भौगोलिकरूपले कठिनाइ र स्थानीयको अवरोध आदिले ढिलाइ भइरहेको लामिछानेको भनाइ छ । अब झण्डै २० किलोमिटर ट्र्याक खोल्न बाँकी छ ।
उता दुई वर्षअघि नै चीनको तिब्बतबाट ओलाङचुङगोला बस्तीसम्म ट्र्याक खुलिसकेको छ । स्थानीयको समेत लगानी रहेको टिपतालादेखि ओलाङचुङगोला बस्तीसम्मको झण्डै २१ किलोमिटरको ट्र्याक खोल्न झण्डै रु तीन करोड लागेको थियो ।
सदरमुकामबाट झण्डै तीन दिनको पैदल दूरीमा पर्ने ओलाङचुङगोलामा हाल बसोबास गरिरहेका र यहाँ जन्मिएर देश तथा विदेशमा रहेकाले पैसा जम्मा गरी बाटो खनाएका थिए । चाँडै गाडी चढ्ने सपनासहित आफैँ लगानी गरेर सडक खनाएका स्थानीय सर्वसाधारणले भने उक्त सडकमा अझै गाडी चढ्न पाएका छैनन् ।
छोटो दूरीमा नै प्रदेश नं १ लाई दुई छिमेकी मुलुक चीन र भारतसँग जोड्ने रणनीतिक महत्वको सडक भए पनि निर्माण कार्य भने कछुवाको गतिमा रहेको भन्दै स्थानीयवासीले गुनासो गर्ने गरेका छन् ।
पूर्वको समृद्धिसँग जोडिएको यो सडकलाई उच्च प्राथमिकतामा राखेर काम अघि बढाउनु पर्नेमा स्थानीयवासीको जोड छ । छिमेकी मुलुक भारत र चीनलाई १४ वटा सडक सञ्जालले जोड्ने सरकारको योजनाअनुसार लोकमार्गको ट्र्याक खोल्ने काम शुरु भएको थियो ।
तर पर्याप्त बजेट विनियोजन नहुँदा निर्माणले गति लिन नसकेको बताइएको छ । यो सडक निर्माण पूरा भए ताप्लेजुङसहित पूर्वी पहाडी जिल्लामा उत्पादन हुने अलैँची, चिराइतोलगायत जडीबुटी चीन र भारत निर्यातमा सहज हुने स्थानीय व्यवसायी बताउँछन् ।
-1732261651.jpg)
-1732259528.jpg)