सीको आगमन ऐतिहासिक अवसरः गच्छदार
नेपाली कांग्रेसका नेता विजयकुमार गच्छदारले चीनका राष्ट्रपति सी चिनफिङको भ्रमण देशका लागि ऐतिहासिक सुखद अवसर भएको बताएका छन्।
विराटनगर विमानस्थलमा संचारकर्मीसँग कुरा गर्दै गच्छदार । तस्वीरः कमल रिमाल
शुक्रबार विराटनगर विमानस्थलमा संचारकर्मीसँग कुरा गर्दै नेता गच्छदारले सरकारले यो अवसरको सदुपयोग गर्न सक्नु पर्ने बताए ।
सीको स्वागतका लागि सरकारले राम्रो तयारी गर्नेमा आफू विश्वस्त रहेको बताउँदै उनले नेपाली कांग्रेसले पनि सीको भ्रमणलाई सकारात्मक रूपमा लिएको स्पष्ट पारे ।
“२३ वर्षपछि चीनका राष्ट्रपतिको नेपाल भ्रमण हुँदैछ सरकारले छिमेकी देशसँगको सम्बन्ध अझ प्रगाढ बनाउन सक्नुपर्छ”, उनले भने, “संसारकै शक्तिशाली छिमेकी देश चीन र भारतबाट हामीले फाइदा लिन सक्नुपर्छ ।”
धार्मिक, ऐतिहासिक, सांस्कृतिक रूपमा चीनसँग नेपालको सम्बन्ध रहेको बताउँदै गच्छदारले केरुङ–काठमाडौं रेलमार्ग बन्नेमा आशा व्यक्त गरे ।
आफू यातायात मन्त्री भएका बेला २०७२ सालमा केरुङ–काठमाडौं द्रुतमार्ग सम्भाव्यता बारे दुई देशबीच छलफल भएको जानकारी दिंदै उनले राष्ट्रपति सीको भ्रमणले त्यसले पूर्णता पाउने बताए ।
सी विचारका बारे चलिरहेको बहसका बारेमा नेता गच्छदारले यसलाई छलफलमा ल्याउनु जरुरी नभएको बताए । “सी विचार र चिन्तनले नेपाल अघि बढ्नु पर्छ भन्ने छैन, नेपाली जनता आफै बुझ्ने छन्”, उनले भने ।
राजनीतिक स्वतन्त्रता भएको देशमा कसैको पनि विचारबाट नेपाली प्रभावित नहुने उनको तर्क छ । सुखी नेपाली समृद्ध नेपाल भन्ने वर्तमान सरकारको नारा सफल होस् भन्ने पनि नेता गच्छदारले शुभकामना दिए ।
यस वर्षको दशैंले नेपाली कांग्रेसका नेता कार्यकर्तामा सद्बुद्धि पलाओस् भन्ने कामना गर्दै गच्छदारले पार्टी एकताको विकल्प नभएको बताए ।
-1732180391.jpg)
-1732099242.jpg)