सरकारी अस्पतालबाटै बिरामी लान्छन् दलालले
.jpg)
पहाडी जिल्ला तथा तराईका भित्री गाउँबाट उपचारका लागि विराटनगर आउने बिरामीबाट उपचारका नाममा रकम असुली गर्ने क्लिनिक सञ्चालक विराटनगरमा सक्रिय छन् ।
काेशी अञ्चल अस्पताल । तस्वीरहरुः कमल रिमाल
क्लिनिक सञ्चालकले दलाल राखेर सरकारी अस्पतालमा आएका बिरामीलाई समेत फकाएर ल्याउने गरेका छन् । प्रदेश १ कै सबै भन्दा ठूलो सरकारी अस्पताल विराटनगरको कोशी अञ्चल अस्पताल वरपर बिरामी खोज्ने दलालको बिगबिगी हुने गरेको छ ।
शुक्रबार बिहान अस्पताल परिसरभित्र र बाहिर एक दर्जनभन्दा बढी बिरामी खोज्ने व्यक्तिहरू सक्रिय थिए । उनीहरू अस्पतालको पुर्जी बोकेका बिरामीलाई अनावश्यक सोधखोज गर्दै थिए ।
अस्पतालको बहिरंग सेवाको पुर्जी काटेपछि लाइनमा बसेका ज्येष्ठ नागरिकलाई एक व्यक्तिले फकाउँदै भने, “सरकारी अस्पतालको जाँच र उपचार ५ दिन लाग्छ, बाहिर गयो भने त्यत्तिनै खर्चमा उपचार हुन्छ ।”
अस्पतालको गेटमा बिरामी खोज्न बसेका दलाल (सेतो टिसर्टमा हात बाँधेर बसेका) ।
ती व्यक्तिले निकै प्रयास गरे पनि बिरामी अस्पतालबाट बाहिर जान मानेनन् । अस्पतालमा दैनिक एउटै व्यक्ति बिरामी फकाउन आउने गरेको अस्पताल प्रशासन र त्यहाँका सुरक्षागार्डलाई पनि थाहा छ ।
क्लिनिक सञ्चालकहरूका अनुसार, कतिपय बिरामीलाई अस्पतालकै स्वास्थ्यकर्मीले बाहिरका निजी अस्पतालमा पठाउने गरेका छन् । क्लिनिक सञ्चालकहरूले रिक्सा र ई–रिक्सा चालकलाई पनि बिरामी खोज्न परिचालन गर्ने गरेका छन् ।
एक चालकका अनुसार, बसबाट ओर्लिएका बिरामीलाई क्लिनिकमा पुर्याए बापत रु १ हजार दिने गरिएको छ । त्यस बाहेक बिरामी खोज्न क्लिनिकहरूले परिचालन गरेका व्यक्ति सडकमा घुमेर बिरामीलाई फकाउँछन् ।
जिल्ला स्वास्थ्य कार्यालय मोरङका प्रमुख ज्ञानबहादुर बस्नेतले बिरामीलाई ठगी गर्ने क्लिनिकहरूका विषयमा सूचना आउने गरे पनि संघ, प्रदेश र स्थानीय सरकारमध्ये जिम्मेवारी बाँडफाँट भई नसकेकाले कारबाहीमा जान असहज भएको बताए ।
ठगिएका बिरामीले जिल्ला प्रशासनमा उजुरी गर्ने गरेको बताउँदै बस्नेतले कहिले काहीँ टोली बनाएर अनुगमन गर्ने गरिएको जानकारी दिए ।
क्लिनिकमा विशेषज्ञ चिकित्सक नभई मेडिकल अफिसरहरू बस्ने गरेका हुन्छन् । सामान्य बिरामीलाई दश प्रकारका जाँच लेख्ने र परीक्षण नगरी झुटा रिपोर्ट दिने गर्छन् ।
क्लिनिकको ठगीबारे जानकार एक व्यक्तिका अनुसार, रगत, दिसा र पिसाब लिएर अनुमानका भरमा रिपोर्ट दिने गरिन्छ । ल्याब र औषधि पसलको अनुपतिपत्र नभए पनि राजस्व र नगरपालिकाको मात्रै प्रमाणपत्र लिएर कतिपय क्लिनिकहरू सञ्चालनमा छन् ।
घाटामा चलेको सरकारी अस्पतालमा आएका बिरामीलाई नै बाहिरका क्लिनिकका दलालले फकाएर लाने गरेकाले अस्पताललाई थप आर्थिक समस्या पर्दै गएको छ । कतिपय निजी अस्पताल र क्लिनिकमा सरकारी अस्पतालका चिकित्सकले नै ठगिएका बिरामीको जाँच गरिरहेका हुन्छन्।
अस्पताल प्रशासनका नायब सुब्बा नवराज लुइँटेलले बेला बेला दलाल पत्ता लगाएर प्रहरी बोलाई पक्राउ गरिंदै आएको जानकारी दिए ।
अस्पताल भित्र ओपीडीमा आएका बिरामीलाई बाहिर लान फकाउँदै दलाल
“भर्खर आएको छु, समस्याहरू धेरै छन्, पत्ता लगाएर समाधान गर्दै जान्छु”, अस्पताल प्रमुख एवं स्वास्थ्य सेवा विभागका पूर्व प्रमुख गुणराज लोहनीले भने ।
विभागको प्रमुखबाट सरुवा भएर कोशी अस्पताल आउने बित्तिकै डा. लोहनीले पहिले अस्पताल भित्रका समस्या समाधान गरेर बाहिरका समस्या समाधान गर्ने बताएका थिए । ठगिएका बिरामीले उजुरी गरे ठगीमा संलग्नलाई पक्राउ गरेर कारवाही गरिने मोरङका प्रहरी नायब उपरीक्षक राजकुमार खिउजुले बताए ।
-1732180391.jpg)
-1732099242.jpg)