पक्राउ पर्नुअघि लामिछानेले भने- ममाथि ठूलो अन्याय भयो
सहकारी ठगी एवं संगठित अपराधको मुद्दामा उच्च अदालतले थुनामा राख्न आदेश दिएसँगै प्रहरीले राष्ट्रिय स्वतन्त्र पार्टीका सभापति रवि लामिछानेलाई पक्राउ परेका छन्।
नेपाल प्रहरीको केन्द्रीय अनुसन्धान ब्यूरो (सीआईबी) र काठमाडौं उपत्यका अपराध अनुसन्धान कार्यालयको टोलीले शुक्रबार राति लामिछानेलाई काठमाडौंबाट पक्राउ गरेको हो। अदालतको आदेशअनुसार, लामिछानेलाई पक्राउ गरिएको सीआईबीका प्रवक्ता सुधिरराज शाहीले बताए।
बुढानीलकण्ठस्थित निवासबाटै लामिछानेलाई पक्राउ गरिएको हो। उनलाई टेकुस्थित काठमाडौं उपत्यका अपराध अनुसन्धान कार्यालयको हिरासतमा राखिएको छ। त्यहाँबाट रुपन्देही लगिनेछ।
पक्राउ पर्नुअघि लामिछानेले आफूमाथि अन्याय भएको बताएका थिए। सामाजिक सञ्जाल मार्फत आफ्नो भनाइ राख्दै लामिछानेले भनेका थिए, 'सम्मानित अदालतको आदेशको सम्मान गर्दै म आफै आजै अहिले नै गिरफ्तारी दिँदै छु। साथै न्यायालयका अन्य ढोकाहरु मेरा लागि खुल्ला होलान् नै। न्यायका लागि दुनियाँका सबै ढोका ढकढकाउछु। ममाथि ठूलो अन्याय भएको छ।'
सहकारी ठगी मुद्दामा जिल्ला अदालत, रुपेन्देहीले लामिछानेलाई एक करोड रूपैयाँ धरौटीमा छोड्न आदेश दिएको थियो। त्यस विरूद्ध परेको पुनरावेदनमा उच्च अदालतले उल्टाईदिएको छ। न्यायाधीशद्वय रमेश ढकाल र स्वीकृति पराजुलीको इजलासले पुर्पक्षका लागि थुनामा राख्न आदेश दिएको हो।
रूपेन्देहीको सुप्रिम सहकारीबाट लामिछाने सहित ४२ जनाले ५५ करोड रूपैयाँ अपचलन गरेको भन्दै मुद्दा दायर भएको थियो। गत माघ १३ गते जिल्ला अदालतले लामिछानेलाई धरौटीमा छोड्न भनेको थियो।
लामिछाने विरूद्ध कास्की, काठमाडौं, चितवन र पर्सामा पनि सहकारीको रकम संगठित तवरमा ठगी गरेको आरोपमा मुद्दा दायर भएको छ। पर्सा बाहेक सबै ठाउँमा उनलाई धरौटीमा छोड्न आदेश दिएको थियो।
-(1)-1743769247.jpg)
