नेपाल नेदरल्यान्ड्ससँग २० रनले पराजित
त्रिदेशीय महिला टी-२० शृंखलाको पहिलो खेलमा नेपाल नेदरल्यान्ड्ससँग २० रनले पराजित भएको छ।
कीर्तिपुरस्थित त्रिवि क्रिकेट मैदानमा बिहीबार भएको खेलमा नेदरल्यान्ड्सले दिएको १५८ रनको लक्ष्य पछ्याउने क्रममा नेपालले सात विकेटको क्षतिमा १३७ रन मात्रै बनाउन सक्यो।
नेपालका लागि सीता राना मगरले २८, कविता जोशीले २७, पूजा महतोले २४ र रुविना क्षेत्रीले ११ रन बनाए। अन्य खेलाडीले राम्रो प्रदर्शन गर्न सकेनन्।
नेदरल्यान्ड्सका लागि कोर्लिन डिलङ र इभा लिन्चले दुई-दुई तथा आइरिस विलिङ र फ्रेडेरिक ओभरडिजले एक-एक विकेट लिए।
यसअघि ब्याटिङ गरेको नेदरल्यान्ड्सले चार विकेटको क्षतिमा १५७ रन बनाएको थियो। नेदरल्यान्ड्सका लागि रोबिन रिज्केले अर्धशतक प्रहार गरिन्। उनले ४८ बलमा आठ चौकाको मद्दतले ५९ रन बनाइन्।
त्यस्तै, आइरिस विलिङले ३१ रन बनाइन्। उनले १३ बलमा पाँच चौका प्रहार गरिन्। यसैगरी, स्टेर कालिसले २९ र हेइदर सिजरले २३ रन बनाए।
नेपालका लागि कविता कुँवर, पूजा महतो, ईश्वरी विष्ट र सीता राना मगरले एक-एक विकेट लिए।
त्रिदेशीय शृंखलाको अर्को खेलमा शुक्रबार थाइल्यान्ड र नेदरल्यान्ड्सले प्रतिस्पर्धा गर्नेछन्। नेपालको अर्को खेल शनिबार थाइल्यान्डसँग हुनेछ।
