राष्ट्रिय संग्रहालयमा अब ऐतिहासिक हातहतियार हेर्न पाइने (तस्वीरहरू)

काठमाडौंको छाउनीस्थित राष्ट्रिय संग्रहालयमा अब ऐतिहासिक हातहतियार र औजार हेर्न पाइने भएको छ।

भूकम्पमा क्षति भएका संग्रहालय पुनर्निमाण भएसँगै मल्लकालीन सामग्री हेर्न पाइने भएको हो। पुनर्निर्माण गरिएको प्रदर्शनी कक्षको शुक्रबार पुरातत्त्व विभागकी महानिर्देशक सौभाग्य प्रधानाङ्गले उद्घाटन गरेकी छन्।

२०७२ सालको भूकम्पमा क्षति हुँदा प्रदर्शनी कक्ष बन्द रहेको थियो। भवनलाई पुनर्निर्माण गरी ऐतिहासिक हातहतियार तथा औजारको प्रदर्शनी खुला गरिएको हो।

national museum (2).jpg

यसमा मल्लकालीन अन्तिम राजासँगै पृथ्वीनारायाण शाह र उनका भाइभारदारले प्रयोग गरेका हातहतियार र औजार रहेको संग्रहालयका प्रमुख जयराम श्रेष्ठले बताए। संग्रहालयमा नेपालका पहिलो प्रधानमन्त्री भीमसेन थापाले प्रयोग गरेका हातहतियार पनि राखिएका छन्।

हतियार कक्षको उद्घाटन गर्दै पुरातत्व विभागकी महानिर्देशक प्रधानाङ्गले नेपाल एकीकरण तथा त्यसपछि राजाहरूले प्रयोग गरेका हातहतियारबारे अध्ययन अनुसन्धान गर्न सहयोग हुने बताइन्।

national museum (4).jpg