एकीकृत समाजवादीका नेताको जिम्मेवारी हेरफेर, कसलाई के?

नेकपा (एकीकृत समाजवादी)ले नेताहरूको जिम्मेवारी हेरफेर तथा कार्यविभाजन गरेको छ।

एकीकृत समाजवादीको स्थायी कमिटी बैठकले गरेको कार्यविभाजनमा अध्यक्ष माधवकुमार नेपालको नेतृत्वमा २४ सदस्यीय केन्द्रीय सचिवालय गठन भएको सचिव सोमप्रसाद पाण्डेयले बताए। सम्मानित नेता झलनाथ खनाललाई स्कूल विभाग प्रमुखको जिम्मेवारी दिइएको छ।

त्यस्तै, संगठन विभाग प्रमुखमा बेदुराम भुसाल, विदेश विभाग प्रमुखमा प्रमेश हमाल, राजकीय मामिला विभाग प्रमुखमा घनेन्द्र बस्नेत र मोर्चा फाँट प्रमुखमा वरिष्ठ उपाध्यक्ष राजेन्द्र पाण्डेलाई जिम्मेवारी दिइएको छ।

पार्टी उपाध्यक्ष जगन्नाथ खतिवडालाई संघीय तथा प्रादेशिक मामिला प्रमुख, उपाध्यक्ष प्रकाश ज्वालालाई प्रचार विभाग प्रमुख बनाइएको छ। यसैगरी, उपाध्यक्ष जयन्ती राईलाई अखिल नेपाल महिला संघ समाजवादीको इन्चार्ज, उपाध्यक्ष भानुभक्त जोशीलाई सुदूरपश्चिम प्रदेश इन्चार्ज, उपाध्यक्ष धर्मनाथप्रसाद साहलाई मधेश प्रदेश इन्चार्ज र उपाध्यक्ष गंगालाल तुलाधरलाई बागमती प्रदेश इन्चार्जको जिम्मेवारी दिइएको छ।

महासचिव घनश्याम भुसाललाई अनुगमनको जिम्मा दिइएको छ। उपमहासचिव राजेन्द्र राईलाई कोशी प्रदेश इन्चार्ज बनाइएको छ। त्यस्तै, अर्का उपमहासचिव रामकुमार भट्टराईलाई कार्यालय सचिव, उपमहासचिव गरिमा शाहलाई संसदीय इन्चार्ज र उपाध्यक्ष मेटमणि चौधरीलाई लुम्बिनी इन्चार्ज तोकिएको छ। सचिव श्रीनाथ बराललाई गण्डकी इन्चार्ज र सचिव चन्द्रबहादुर शाहीलाई कर्णाली प्रदेशको इन्चार्ज बनाइएको छ।

युवा विभागको इन्चार्जको जिम्मेवारी लक्ष्मण केसी र विद्यार्थी विभाग इन्चार्जको जिम्मेवारी रामकुमारी झाँक्रीलाई प्रदान गरिएको उपाध्यक्ष खतिवडाले बताए।