बुटवलमा बोलेरो दुर्घटना, दम्पती सहित तीनको मृत्यु
बुटवलमा बोलेरो दुर्घटना हुँदा दम्पती सहित तीन जनाको ज्यान गएको छ।
शनिबार बिहान बुटवलस्थित तिनाउ पुलमा बोलेरो अनियन्त्रित भई पल्टिएको इलाका प्रहरी कार्यालय, बुटवलले जनाएको छ। लु २ च २४८० नम्बरको बोलेरो दुर्घटना हुँदा तीनै जनाको घटनास्थलमै मृत्यु भएको हो।
दुर्घटनामा बुटवल-१२ नयाँ गाउँका ७१ वर्षीय तिलकराम खनाल, ६७ वर्षीया गौरी खनाल र बोलेरो चालक ३२ वर्षीय हरि न्यौपानेको मृत्यु भएको इलाका प्रहरी कार्यालयका प्रहरी नायब उपरीक्षक विजयराज पण्डितले बताए। तिलकराम र गौरी श्रीमान्-श्रीमती हुन्।
डीएसपी पण्डितका अनुसार दमले समस्या भएपछि गौरीलाई उपचारका लागि नयाँ गाउँबाट लुम्बिनी प्रादेशिक अस्पताल लगिंदै थियो। सोही क्रममा बोलेरो अनियन्त्रित भई पुलको डिभाइडरमा ठोक्किएको हो।
मृतकको शव परीक्षणका लागि लुम्बिनी प्रादेशिक अस्पतालमा राखिएको छ।
-1734177683.JPG)
