लोकेशको विस्फोटक ब्याटिङमा विराटनगरको शानदार जित
लोकेश बमले विस्फोटक ब्याटिङ गरेपछि विराटनगर किंग्सले शानदार जित निकालेको छ।
नेपाल प्रिमियर लिग अन्तर्गत बुधबार त्रिवि क्रिकेट मैदानमा विराटनगरले लुम्बिनीलाई दुई विकेटले पराजित गरेको हो। लुम्बिनीले दिएको १९४ रनको लक्ष्य विराटनगरले १९.५ ओभरमा आठ विकेट गुमाएर पूरा गर्यो।
विराटनगरलाई अन्तिम ओभरमा १६ रन चाहिएको थियो। क्रिस सोलले लगातार तीन वटा बाउन्ड्री प्रहार गरेर विराटनगरलाई जिताएका हुन्।
विराटनगरका लागि लोकेश बमले ७१ रन प्रहार गरे। उनले ४७ बलमा तीन चौका र ६ छक्का प्रहार गरे।
त्यस्तै, बसिर अहमदले ४०, मार्टिन गप्टिलले २८ र क्रिस सोलले १४ रन प्रहार गरे। लुम्बिनीका लागि दुर्गेश गुप्ताले तीन, साद विन जाफर र रोमन सायमन्डसले दुई-दुई तथा विवेक यादवले एक विकेट लिए।
यसअघि ब्याटिङ गरेको लुम्बिनीले सात विकेटको क्षतिमा १९१ रन बनाएको थियो। लुम्बिनीका लागि रोहित पौडेलले ४०, टोम मोरिसले ३०, विवेक यादवले १९, अर्जुन साउदले १७, आशुतोष गिरैया र साद विन जाफरले १५-१५ रन बनाए।
त्यस्तै, विराटनगरका लागि सन्दीप लामिछाने, इश्मात आलम र राजेश पुलामीले एक-एक विकेट लिए।
यसअघि भएको खेलमा काठमाडौं गुर्खाजले कर्णाली याक्सलाई पराजित गरेको थियो। बिहीबार बिहान ९:१५ बजे पोखरा एभेन्जर्स र जनकपुर बोल्टस् तथा अपराह्न १:१५ बजे काठमाडौं गुर्खाज र सुदूरपश्चिम रोयल्सबीच प्रतिस्पर्धा हुनेछ।
