पूर्व सभामुख ढुंगानाको निधनको शोकमा आज सार्वजनिक बिदा
पूर्व सभामुख दमननाथ ढुंगानाको निधनको शोकमा सरकारले आज सार्वजनिक बिदा दिने निर्णय गरेको छ।
प्रधानमन्त्री निवास बालुवाटारमा मंसीर ३ गते बिहान बसेको मन्त्रिपरिषद् बैठकले आज सार्वजनिक बिदा दिने निर्णय गरेको सरकारका प्रवक्ता एवं सञ्चार तथा सूचना प्रविधिमन्त्री पृथ्वी सुब्बा गुरुङले बताए। “पूर्व सभामुख ढुंगानाको सम्मानमा आज सार्वजनिक बिदा दिने र स्वदेश तथा विदेशस्थित सबै कार्यालयमा आज दिनभर राष्ट्रिय झन्डा आधा झुकाउने निर्णय भएको छ,” प्रवक्ता गुरुङले भने।
सरकारले पूर्व सभामुख ढुंगानाको राष्ट्रिय सम्मानका साथ अन्त्येष्टि गर्ने निर्णय गरेको छ। राष्ट्रिय सम्मान व्यवस्थापनको जिम्मेवारी गृह मन्त्रालयलाई दिइएको छ।
नेपालको संसदीय प्रणालीलाई व्यवस्थित बनाउन खेलेको भूमिकाको बैठकले कदर गरेको उल्लेख गर्दै उनको निष्ठा र आदर्शलाई आत्मसम्मान गर्नु नै सच्चा श्रद्धाञ्जली हुने गुरुङको भनाइ छ। मन्त्रिपरिषद् बैठकले ढुंगानाको निधनप्रति गहिरो दुःख शोक व्यक्त गर्दै भावपूर्ण श्रद्धाञ्जली अर्पण तथा परिवारजनमा गहिरो समवेदना प्रकट गरेको छ।
बानेश्वरस्थित फ्रन्टलाइन अस्पतालमा उपचारका क्रममा ढुंगानाको ८३ वर्षको उमेरमा मंसीर २ गते निधन भएको हो। मानव अधिकारकर्मी तथा नागरिक समाजका अगुवा ढुंगाना कलेजोसँग सम्बन्धित समस्याका कारण केही समयदेखि उपचाररत थिए।
-1-1731672681.jpg)
