विश्वकपमा पुगेको टोलीका खेलाडीलाई जनही साढे दुई लाख पुरस्कार
आईसीसी यू-१९ विश्वकपका लागि छनोट भएको नेपाली महिला क्रिकेट टोलीका खेलाडीलाई जनही दुई लाख ५० हजार रुपैयाँ पुरस्कार प्रदान गरिने भएको छ।
नेपाल क्रिकेट सङ्घ (क्यान)ले पहिलो पटक विश्वकपमा पुगेको नेपाली प्रोत्साहन स्वरुप नगद रकम दिने निर्णय गरेको प्रवक्ता छुम्बी लामाले बताए। त्यस्तै, टोलीमा समावेश अफिसियललाई जनही एक लाख ५० हजार रुपैयाँ पुरस्कारबाट सम्मान गर्ने निर्णय भएको छ।
यूएईको अजमानमा सम्पन्न प्रतियोगितामा घरेलु टोलीलाई आठ विकेटको पराजित गर्दै नेपाल यू-१९ विश्वकपका लागि छनोट भएको थियो। नेपाली युवा टोली पहिलो पटक विश्वकपमा पुगेको हो।
यू-१९ विश्वकप सन् २०२५ मा मलेशियामा हुँदै छ। यससँगै नेपालका यू-१९ एशिया कपका लागि पनि छनोट भएको छ। एसीसीको आयोजनामा आगामी डिसेम्बरमा यू-१९ महिला एशिया कपका लागि पनि नेपाल छनोट भएको हो।
एशिया कप क्रिकेटमा नेपालसँगै पाकिस्तान, भारत, श्रीलङ्का, बाङ्लादेश र मलेशिया प्रतिस्पर्धा गर्नेछन्।
