निजी घरमा पनि अब राष्ट्रिय झण्डा राख्न पाइने
सरकारले राष्ट्रिय झण्डा र राष्ट्रिय गानको प्रयोग सम्बन्धी कार्यविधि २०६९ परिवर्तन गरेको छ ।
परिवर्तित कार्यविधिअनुसार, अब निजी घरमा पनि राष्ट्रिय झण्डा राख्न पाइने भएको छ । संविधान दिवस मूल समारोह समिति अन्तर्गत गठित प्रचारप्रसार उपसमितिको बुधबार बसेको बैठकमा कार्यविधि परिवर्तनबारे जानकारी गराइएको हो ।
संविधान दिवस तथा राष्ट्रिय दिवसमा हातहात र घरघरमा राष्ट्रिय झण्डा फहराइन कार्यविधि नै परिवर्तन गरिएको हो । तर, प्लाष्टिकको झण्डा बनाउन नपाइने भएको छ ।
झण्डा कपडा वा कागजको हुनुपर्ने निर्देशिकामा उल्लेख गरिएको छ । झण्डालाई सम्मानपूर्वक प्रयोग गरी टिसर्टका रुपमा पनि लगाउन पाइने प्रबन्ध गरिएको छ ।
सञ्चार तथा सूचना प्रविधिमन्त्री गोकुलप्रसाद बाँस्कोटाको अध्यक्षतामा गठित उपसमितिले संविधानबारे विशेष सामग्री प्रकाशन, प्रसारण गर्न सबै सञ्चारमाध्यमलाई आग्रह पनि गरेकोे छ ।
“संविधान त्यतिकै आएको होइन, अब संविधान संशोधन भए पनि अर्काे राष्ट्रिय दिवस हुँदैन । जो जो जतिसुकै उफ्रेपनि गणतन्त्र फालिँदैन”, मन्त्री बाँस्कोटाले भने । उनले कर्मचारीलाई बिदा दिइए पनि अन्य व्यक्तिगत कामका लागि नभई उत्सव मनाउन बिदा दिइएको बताए ।