पाठ्यपुस्तकका त्रुटि सच्याउन ध्यानाकर्षण

शिक्षा

पाठ्यपुस्तकका त्रुटि सच्याउन ध्यानाकर्षण

हिमालखबर बुधबार, कात्तिक २८, २०८१

विद्यालय तहका पाठ्यपुस्तकमा रहेका त्रुटि सच्याउन अनेरास्ववियुको काठमाडौं जिल्ला कमिटिले पाठ्यक्रम विकास केन्द्रको ध्यानाकर्षण गराएको छ।

पाठ्यपुस्तकमा रहेका त्रुटिका विषयमा हिमालखबरले विशेष रिपोर्ट प्रकाशित गरेको थियो। त्यसकै आधारमा अध्ययन गरेर त्रुटि सच्याउन केन्द्रको ध्यानआर्कषण गराएको अनेरास्ववियु जिल्ला कमिटीका इन्चार्ज धर्मराज तिमल्सिनाले बताए।

अनेरास्ववियुले कक्षा ९ र १० को नेपाली विषयमा भएका अनेक भाषा, व्याकरण र शब्दार्थका गल्तीबारे पाठ्यक्रम विकास केन्द्रका महानिर्देशक इमनारायण श्रेष्ठलाई ज्ञापनपत्र बुझाएको हो। अहिलेलाई पाठ्यपुस्तक विकास केन्द्र नै मुख्य भएकाले त्रृटि सच्याउन दबाब दिएको बताउँदै तिमल्सिनाले भने, “महानिर्देशकसँग यसबारे सबै कुरा राखेका छौं। उहाँले पनि सबै सच्याउने प्रतिबद्धता गर्नु भएको छ।”

अहिले विद्यालय तहमा ५६ लाख ७६ हजारभन्दा बढी विद्यार्थी अध्ययनरत छन्। उनीहरूलाई पाठ्यपुस्तकमार्फत गलत जानकारी दिइरहेको अनेरास्ववियुले औल्याएको छ।

पाठ्यपुस्तकमा भए गरिएका कमजोरी सच्याउन र आवश्यक छानबिन गरी २०८२ सालमा प्रकाशित हुने पाठ्यपुस्तक सच्याएर मात्र प्रकाशित र वितरण गर्न अनेरास्ववियुले केन्द्रलाई आग्रह गरेकोछ ।

पाठ्यक्रम विकास केन्द्रका महानिर्देशक श्रेष्ठले पाठ्यपुस्तकका कमजोरी सच्याउने र शैक्षिक सत्र २०८२ सालमा सबै कमजोरी सच्याएर पुस्तक विरतण गर्ने बताए।

यो पनि पढ्नुहोस् : पल्टाउनै लाज लाग्ने पाठ्यपुस्तक