बागलुङमा पिकअप भ्यान दुर्घटना, पाँच जनाको मृत्यु
बागलुङको जैमिनि नगरपालिका-७, जैदीको व्यार्थला नजीक पिकअप भ्यान दुर्घटना हुँदा पाँच जनाको मृत्यु भएको छ।
जैमिनी-८ छिस्तीबाट जिल्ला सदरमुकाम बागलुङ बजार आउँदै गरेको ग २ च ९२४७ नम्बरको पिकअप भ्यान सोमबार बिहान दुर्घटना भएको जिल्ला प्रहरी कार्यालयले जनाएको छ।
दुर्घटनामा पाँच जनाको घटनास्थलमै मृत्यु भएको जिल्ला प्रहरी कार्यालयका प्रहरी निरीक्षक केशव थापाले बताए। दुर्घटनामा जैमिनि-८ छिस्ती केवइका ३८ वर्षीय महेन्द्र पुन, २० वर्षीया रश्मि श्रीस, ५० वर्षीया नन्दकली पुन, १७ वर्षीय नीरज श्रीस र ७५ वर्षीय कुलप्रसाद श्रीसको मृत्यु भएको प्रहरी निरीक्षक थापाले बताए। महेन्द्र जीपका चालक हुन्।
त्यस्तै, दुर्घटनामा जैमिनि-८ का ४५ वर्षीय गङ्गाबहादुर श्रीस घाइते भएका छन्। उनलाई उपचारका लागि धौलागिरि अस्पताल लगिँदै छ।
गाडी सडकबाट खसेको छ। दुर्घटनाको कारण खुल्न सकेको छैन।
