रवि लामिछानेबारे रास्वपाले ढाँट्यो कि प्रहरीले?
सहकारी ठगी र संगठित अपराधको आरोपमा पक्राउ परेका राष्ट्रिय स्वतन्त्र पार्टी (रास्वपा)का सभापति रवि लामिछानेबारे उनको पार्टी र प्रहरीको फरक फरक धारणा सार्वजनिक भएको छ।
रास्वपा केन्द्रीय समितिको कात्तिक १० मा बसेको बैठकले लामिछानेलाई राजनीतिक प्रतिशोधका लागि हिरासतमा राखेको, अनुसन्धानको नाममा थुन्ने र मानसिक दबाब दिने षड्यन्त्र गरेको दाबी गरेको थियो। त्यस विरुद्ध आन्दोलन गर्न रास्वपाले उपसभापतिद्वय डीपी अर्यालको नेतृत्वमा आन्दोलन सञ्चालन मूल समिति र स्वर्णिम वाग्लेको नेतृत्वमा राजनीतिक नागरिक संवादका लागि समिति गठन गरेको छ।
अदालतले हिरासतमा राखेर अनुसन्धान गर्न अनुमति दिएका लामिछानेलाई अविलम्ब रिहा गर्नुपर्ने रास्वपाका कार्यवाहक प्रवक्ता मनिष झाद्वारा जारी विज्ञप्तिमा उल्लेख छ। लामिछाने अहिले जिल्ला प्रहरी कार्यालय, कास्कीको हिरासतमा छन्।
प्रहरीले भने रास्वपाको आरोपको खण्डन गरेको छ। लामिछानेलाई जिल्ला अदालतमा उपस्थित गराउँदा प्रहरी कर्मचारीले आदरार्थी शब्दको प्रयोग नगरेको, इजलासमा हतियार सहित प्रवेश गरेको, धम्क्याएको र प्रहरी हिरासतमा दुर्व्यवहार गरेको जस्ता कुरा भ्रामक र झूटा रहेको जिल्ला प्रहरी, कास्कीको धारणा छ।
कास्की प्रहरीका सूचना अधिकारी बसन्त कुमार शर्माद्वारा जारी विज्ञप्तिमा भनिएको छ, ‘नेपालको संविधान एवम् प्रचलित ऐन कानून बमोजिम फौजदारी न्याय प्रणालीका मूल्य मान्यताको अनुसरण गर्दै परिणाममुखी अनुसन्धान गर्न जिल्ला प्रहरी कार्यालय कास्की सदैव प्रतिबद्ध रहेको अनुरोध गर्दछ।’
रास्वपा सभापति लामिछानेलाई कात्तिक २ गते काठमाडौंबाट पक्राउ गरेर पोखरा लगिएको थियो। कात्तिक ८ मा जिल्ला अदालत, कास्कीले थाप सात दिन हिरासतमा राखेर अनुसन्धान गर्ने अनुमति दिएको छ। उनीमाथि सहकारी ठगी, कीर्ते र संगठित अपराधमा अनुसन्धान भइरहेको छ।
यो पनि पढ्नुहोस् :
_1695277850.jpg)
