अत्यावश्यक काम नपरी घर बाहिर ननिस्कनू : गृह मन्त्रालय
गृह मन्त्रालयले सकेसम्म घर बाहिर ननिस्कन आग्रह गरेको छ।
निरन्तर वर्षाका कारण नदीहरूमा जलसतहले खतराको तह पार गरेको र यो अझै बढ्न सक्ने भएकाले घरमै सुरक्षित बस्न मन्त्रालयले आग्रह गरेको हो। “अत्यावश्यक काम नपरी आवतजावत नगर्नुहोला,” मन्त्रालयका प्रवक्ता ऋषिराम तिवारीले हिमालखबरसँग भने, “नदी तटीय क्षेत्रमा बसोबास गर्ने लगायत सबैलाई पूर्ण सतर्क रहन अपील गर्दछौं।”
नागढुंगा क्षेत्रमा अवरुद्ध सडक खुलाउन सुरक्षाकर्मी परिचालित भएको पनि तिवारीले जानकारी दिए। पहिरो र रूख ढलेर सडक अवरुद्ध हुँदा त्यस क्षेत्रमा सयौं यात्रु अलपत्र छन्।
राससका अनुसार सिन्धुपाल्चोकको लिसंखु पाखरमा पहिरोले घर पुरिंदा दुई जनाको मृत्यु भएको छ। लिसंखु पाखर गाउँपालिकाका अध्यक्ष राजु लामाका अनुसार गए राति आएको पहिरोले पुरिएर वडा नं ३ का पूर्व अध्यक्ष काजीबहादुर लामा र उनकी श्रीमतीको मृत्यु भएको हो।
यस्तै, जिल्ला सदरमुकाम धादिङबेसीलाई पृथ्वी राजमार्गसँग जोड्ने धादिङबेसी-मलेखु सडक पहिरोले अवरुद्ध छ। नीलकण्ठ नगरपालिका–८, दारेगौंडा र साँघुटारमा सडकमाथिबाट खसेको पहिरोले सडक पूर्ण रूपमा अवरुद्ध बनेको हो।
रसुवाको स्याफ्रु–रसुवागढी सडकखण्ड अवरुद्ध हुँदा सयौं सवारीसाधन अलपत्र छन्। काठमाडौंबाट रसुवागढी जाँदै गरेका र केरुङबाट काठमाडौंका लागि मालवस्तु बोकी आएका मालवाहक सवारीसाधन टिमुरे क्षेत्रमै रोकिएको रसुवाका प्रमुख जिल्ला अधिकारी वेदनिधि खनालले जानकारी दिए।
