कुलेखानी जलाशय भरियो, गेट आंशिक खोलियो
अविरल वर्षाका कारण मकवानपुरस्थित कुलेखानी जलविद्युत् केन्द्रको जलाशय भरिएको छ।
जलाशयमा पानीको सतह बढी भएर पानी स्पिल वेबाट बाहिर जान थालेपछि शनिबार बिहान ५:४५ बजेबाट बाँधमा रहेका दुई वटा ढोका (गेट) आंशिक रूपमा खोलिएका छन्। पानीको सतह बढ्न थालेपछि शुक्रबारबाटै ६० मेगावाटको विद्युत्गृहलाई निरन्तर रूपमा पूर्ण क्षमता चलाइएको छ।
विद्युत्गृहलाई पूर्ण क्षमतामा चलाउँदा पनि जलाधार क्षेत्रमा अविरल वर्षाका कारण जलाशयको पानी भण्डार गर्ने क्षमता भरिएको हो। जलाशयमा पानीको तह समुद्री सतहबाट एक हजार ५३०.९३ मिटर पुगेको छ।
केन्द्र प्रमुख तारादत्त भट्टका अनुसार पानीको तह एक हजार ५३०.३५ पुगेपछि बाँधका ढोका आंशिक रूपमा खोलिएका छन्। कुलेखानीको जलाधार क्षेत्रमा हावाहुरी सहित अविरल वर्षा भइरहेकाले दुई वटै ढोका पूर्ण रूपमा खोल्नुपर्ने अवस्था आउन सक्ने प्रमुख भट्टले बताए।
बाँधका ढोका खोलिएकाले जलाशयको तल्लो तटीय क्षेत्रमा पर्ने बागमती नदीको बहाव बढ्ने हुँदा वरपर क्षेत्रका स्थानीय बासिन्दालाई समयमै सुरक्षित रहन र उच्च सतर्कता अपनाउन केन्द्रले आग्रह गरेको छ।
