बाग्लुङमा पिकअप भ्यान दुर्घटना, गाउँपालिका उपाध्यक्ष सहित तीन जनाको मृत्यु
बाग्लुङमा सरकारी नम्बर प्लेटको पिकअप भ्यान दुर्घटना हुँदा गाउँपालिका उपाध्यक्ष सहित तीन जनाको मृत्यु भएको छ भने एक जना घाइते भएका छन्।
शुक्रबार बिहान गलकोट नगरपालिका-२ भुङ्खानीमा रा १ ज २०० नम्बरको पिकअप भ्यान दुर्घटना भएको हो। दुर्घटनामा तीन जनाको घटनास्थलमै मृत्यु भएको जिल्ला प्रहरी कार्यालय, बाग्लुङका प्रहरी निरीक्षक प्रताप पौडेलले बताए।
दुर्घटनामा रुकुमकाे पुथा उत्तरगंगा गाउँपालिकाका उपाध्यक्ष भुपेन्द्रा बुढा मृत्यु भएको जिल्ला प्रहरी कार्यालयका नायव उपरीक्षक विजय यादवले बताए। अन्य दुई जनाको सनाखत हुन सकेको छैन।
त्यस्तै, दुर्घटनामा घाइते भएका एक जनाको उद्धार गरिएको छ। घाइतेको पनि परिचय खुलेको छैन। उनलाई उपचारका लागि बाग्लुङकै धौलागिरि अस्पताल लगिएको पौडेलले बताए।
गाडीमा कति जना सवार थिए भन्ने खुलेको छैन। गाडीमा जनप्रतिनिधि र कर्मचारी रहेको प्रहरीले जनाएको छ।
शुक्रबार बिहान दुदिलाभाटीका प्रेमबहादुर कार्कीले घाँस काट्न जाँदा दुर्घटनाग्रस्त गाडी र शव देखेपछि प्रहरीलाई खबर गरेका थिए। अहिले पनि दुर्घटनास्थलमा खोजबिन जारी रहेको यादवले बताए।
-1732180391.jpg)
-1732099242.jpg)
