सौर्य विमान दुर्घटना : २५ चिकित्सक सहितको प्राविधिक टोलीले गर्दै शव परीक्षण
सौर्य एअरलाइन्सको विमान दुर्घटनामा परी मृत्यु भएकाको शव परीक्षण गर्न २५ चिकित्सक सहितको प्राविधिक टोली खटिएको छ।
त्रिभुवन विश्वविद्यालय शिक्षण अस्पताल, महाराजगन्जमा १८ जनाकै शव परीक्षण शुरू गरिएको छ। बुधबारदेखि नै परीक्षण शुरू गरिएको र आज पनि जारी रहने अस्पतालका फरेन्सिक मेडिसिन विभागका प्रमुख डा. गोपालप्रसाद चौधरीले बताए।
बुधबार चार वटा शवको परीक्षण गरिएको छ। एक जनाको शव पत्ता लगाउन चार घन्टा जति लाग्ने उनले बताए।
अस्पतालमा जनशक्ति कम भएकाले पाटन स्वास्थ्य विज्ञान प्रतिष्ठान, भक्तपुर अस्पताल, धुलिखेल अस्पताल र पोखराबाट समेत चिकित्सक बोलाइएको डा. चौधरीले बताए। बुधबार शिक्षण अस्पतालकै चिकित्सकले परीक्षण गरेका छन् भने बिहीबारदेखि बाहिरबाट बोलाइएका चिकित्सक पनि परीक्षणमा जुटेका छन्।
मृतकका आफन्तले उपलब्ध गराएको विवरण अनुसार म्याचिङ गरेर सबै शवको पहिचान ७२ घण्टाभित्र गर्ने डा. चौधरीको भनाइ छ। “आफन्तजनले दिएको विवरण अनुसार शवलाई म्याच गराएर पहिचान प्रक्रिया पूरा गर्नेछौं। सकेसम्म छिटो शव दिने कोशिश छ,” डा. चौधरीले भने, “शव धेरै जलेको हुनाले पहिचान गर्न समय लाग्नेछ।”
अस्पतालले शुरूमा परीक्षण गरिरहेका चार वटा शव पूर्ण रूपमा जलेको उनले बताए। शव पहिचानका लागि फिंगर प्रिन्ट, दाँतको विवरण, हुलिया र डीएनए परीक्षण विधि अपनाइन्छ।
फिंगर प्रिन्ट, दाँतको विवरण, हुलिया विधिबाट शव पहिचान नभए अन्तिममा डीएनए विधिबाट शव पहिचान गरिने उनले बताए। डीएनए विधिबाट शव पहिचान गर्न कम्तीमा दुई साता लाग्ने डा. चौधरीले बताए।
बुधबार बिहान ११ः११ बजे काठमाडौंबाट पोखराका लागि उडेको सौर्य एअरलाइन्सको ‘९एन-एएमई’ जहाज दुर्घटना भएको थियो। विमानमा सवार १८ जनाको मृत्यु भएको छ भने एक जना घाइते छन्।