वर्षाले देशभर बाढीपहिरो र डुबान (तस्वीरहरू)

गए रातिदेखि लगातारको वर्षाले देशका विभिन्न ठाउँमा बाढी, पहिरो र डुबान हुँदा जनजीवन प्रभावित भएको छ।

पहाडी क्षेत्रमा बाढी र पहिरोले बाटोघाटो अवरुद्ध भएको छ भने तराई-मधेशमा डुबान भएको छ। कतिपय स्थानमा घरभित्रै पानी पसेको छ।

देशका प्रमुख नदीहरूमा जलस्तर बढेको छ। कतिपय नदीमा पानीको सतह बढ्ने क्रममा रहेकाले सतर्कता अपनाउन जल तथा मौसम विज्ञान विभागले आग्रह गरेको छ।

दोलखाको गौरीशंकर गाउँपालिका-९ स्थित डोडाङमा अविरल वर्षापछि आएको बाढीमा परेर एक जना हराइरहेका छन् भने तीन घर बगेका छन्। गए राति रोल्वालिङ खोलाको बाढीले रोल्वालिङ पदमार्ग डोडाङमा होटल सञ्चालन गर्दै आएकी ६४ वर्षीया जाङ्मु शेर्पालाई बगाएको छ। उनको खोजी भइरहेको गौरीशंकर-९ का वडाध्यक्ष निमा गेली शेर्पाले बताए।

बाढी र पहिरोले केही राजमार्ग अवरुद्ध भएका छन्। सवारीसाधन बाटामै रोकिंदा यात्रु अलपत्र परेका छन्।

दाङको घोराही उपमहानगरपालिका-१८ स्थित बालुवाटारमा डुबानले घरभित्र पसेको भल।

डुबानमा परेको वीरगन्ज महानगरपालिका-११, श्रीपुर क्षेत्र।

कञ्चनपुरको शुक्लाफाँटा नगरपालिका-११, कलुवापुरमा डुबानमा परेको सार्वजनिक शौचालय।

तिनाउ नदीमा आएको बाढी।

पर्वतमा बाढीले डुबानमा परेको सबैभन्दा ठूलो शालिग्राम शिला र जोखिममा परेको सेतीवेणी बजार।

मर्स्याङ्दी नदीमा आएको बाढी। मनाङको नासो गाउँपालिका–१, ताल गाउँ जोखिममा परेको छ।

लमजुङको सुन्दर बजारस्थित खहरे खोलामा आएको बाढीले सडक अवरुद्ध भएको छ।

दाङको हापुर खोलामा आएको बाढीले खेत कटान गरिरहेको छ।

मनाङ सदरमुकाम चामे बजारबीचबाट बगेको घट्टेखोलामा आएको बाढी र मर्स्याङ्दी नदीमा पानीको सतह बढ्दा जोखिममा रहेको चामे बजार।

भक्तपुरको हनुमन्ते खोलामा आएको बाढी।

तनहुँको शुक्लागण्डकी नगरपालिका-८, पाटन तल ओरालोमा गएको पहिरो।