अस्ट्रेलियालाई हराउँदै भारत विश्वकपको सेमिफाइनलमा
आईसीसी टी-२० विश्वकप क्रिकेट अन्तर्गत गए राति भएको सुपर-८ को खेलमा अस्ट्रेलियालाई हराउँदै भारत सेमिफाइनलमा प्रवेश गरेको छ।
गए राति ग्रोस आइस्लेटमा सम्पन्न खेलमा भारतले अस्ट्रेलियालाई २४ रनले पराजित गरेको हो। यससँगै अस्ट्रेलियाको सेमिफाइनल पुग्ने सम्भावना कमजोर बनेको छ।
यो समूहबाट ६ अंक सहित भारत शीर्षस्थानमा रहेर सेमिफाइनल पुगेको छ। भारतले फाइनल प्रवेशका लागि इङ्ल्यान्डसँग खेल्नेछ।
त्यस्तै, सुपर-८ को अन्तिम खेलमा बाङ्लादेशले अफगानिस्तानलाई हराएमा मात्रै अस्ट्रेलिया सेमिफाइनल पुग्नेछ। अन्तिम खेल जितेमा अफगानिस्तान सेमिफाइनलमा पुग्नेछ।
भारतले दिएको २०६ रनको लक्ष्य पछ्याएको अस्ट्रेलियाले सात विकेट गुमाउँदै १८१ रन मात्र बनाउन सक्यो। अस्ट्रेलियाका ट्राभिस हेडले ७६ रन बनाए। उनले ४३ बलमा नौ चौका र चार छक्का प्रहार गरे।
त्यस्तै, मिचेल मार्सले ३७, ग्लेन म्याक्सवेलले २० र टिम डेभिडले १५ रन बनाए। प्याट कमिन्सले ११ रन बनाउँदा मिचेल स्टार्क चार रनमा अविजित रहे।
भारतका अर्शदीप सिंहले तीन विकेट लिए भने कुलदीप यादवले दुई विकेट लिए। त्यस्तै, जसप्रित बुमराह र अक्षर पटेलले एक/एक विकेट लिए।
त्यसअघि ब्याटिङ गरेको भारतले पाँच विकेट गुमाउँदै २०५ रन बनाएको थियो। भारतका लागि रोहित शर्माले ९२ रन बनाए। ४१ बल खेलेका उनले सात चौका र आठ छक्का प्रहार गरे।
त्यस्तै, सूर्यकुमार यादवले ३१, शिवम दुबेले २८, हार्दिक पान्ड्याले २७, ऋषभ पन्तले १५ र रवीन्द्र जडेजाले नौ रन जोडे। अस्ट्रेलियाका मिचेल स्टार्क र मार्कस स्टोइनिसले दुई/दुई विकेट लिए भने जोश हेजलउडले एक विकेट लिए।
_1695277850.jpg)
