इजरायली प्रधानमन्त्री र हमास नेता विरुद्ध पक्राउ आदेश माग
अन्तर्राष्ट्रिय फौजदारी अदालत (आईसीसी)का मुख्य अभियोजनकर्ता करिम खानले युद्ध अपराधमा दोषी भएको भन्दै इजरायली प्रधानमन्त्री बेन्जामिन नेतान्याहू र प्यालेस्टिनी सैन्य विद्रोही समूह हमासका नेताहरू विरुद्ध पक्राउ आदेश माग गरेका छन्।
आईसीसीमा सोमबार निवेदन दर्ता गर्दै करिमले पक्राउ गर्न आदेश माग गरेका हुन्। उनले सार्वजनिक गरेको विज्ञप्तिमा ७ अक्टोबर २०२३ यता भएका युद्ध अपराध र मानवता विरोधी अपराधका लागि दुवै पक्ष दोषी भएको आधारमा पक्राउ आदेश माग गरिएको उल्लेख गरिएको छ।
इजरायलका प्रधानमन्त्री नेतान्याहू र रक्षामन्त्री यौव गैंलेन्टले सर्वसाधारण विरुद्ध भोकमरी, जानाजान हत्या लगायत रोम विधान उल्लंघन गरेको दाबी गर्दै उनले निवेदन दर्ता गरेका हुन्।
त्यस्तै, उनको निवेदनमा हमासका प्रमुख यहया सिनवर लगायत तीन जना विरुद्ध आक्रमण, हत्या र सर्वसाधारणलाई बन्दी बनाएको जस्ता रोम विधान उल्लंघन गरेको दाबी गर्दै गिरफ्तारीको माग गरिएको छ।
जेनेभाको हेगमा अवस्थित आईसीसीले तीन वर्षदेखि प्यालेस्टाइनमा इजरायलले गरेका गतिविधिको अनुसन्धान गरिरहेको छ। पछिल्लो समय आईसीसीले हमासका गतिविधिको पनि अनुसन्धान गरिरहेको छ।
यो निवेदनको सुनुवाइ तीन वटा न्यायाधीश सम्मिलित पूर्व सुनुवाइ समितिले गर्नुपर्छ। जसले प्रमाणहरूको परीक्षण गरी मुद्दा अगाडि बढाउन उपयुक्त छ/छैन भन्ने निर्णय गर्न दुई महीना जति लगाउँछ।
इजरायल आईसीसीको सदस्य नभएकाले नेतान्याहू र गैंलेन्ट तुरुन्तै पक्राउ पर्ने सम्भावना छैन। तथापि आक्रमण जारी राखे इजरायल एक्लिँदै जाने जोखिम बढ्नेछ। त्यस्तै, इजरायली नेताहरूलाई विदेश भ्रमणमा समस्या सिर्जना हुन सक्नेछ।
-1732175085.png)
-1732099242.jpg)
-1732097316.jpg)
