घरमा आगलागी हुँदा वृद्ध दम्पतीको मृत्यु
धादिङको थाक्रे गाउँपालिका-५, पुरानडाँडास्थित घट्टेखोलाको एक घरमा आगलागी हुँदा वृद्ध दम्पतीको ज्यान गएको छ।
गएराति ७० वर्षीय तेजबहादुर लामाको एकतले घरमा आगलागी भएको थियो। आगलागीमा तेजबहादुर र उनकी पत्नी ७० वर्षीया ठूली लामाको मृत्यु भएको जिल्ला प्रहरी कार्यालय, धादिङका प्रहरी उपरीक्षक गौतम केसीले बताए।
“राति करिब ११ः३० बजे घरमा आगो लागेको खबर पायौं। हाप्सेचौर अस्थायी प्रहरी चौकी र इलाका प्रहरी कार्यालय खानीखोलाको टोली घटनास्थल पुग्दा दुवै जनाको मृत्यु भइसकेको थियो,” केसीले भने। आगलागीमा घरमा भएका अन्नपात र लत्ताकपडा सबै नष्ट भएको छ।
त्यस्तै, गोरखामा आगलागीबाट दुई वटा घर र चार वटा गोठ जलेका छन्। गोरखा नगरपालिका-५ स्थित ठूलोरिपमा घर नजिकै जंगलमा लागेको डढेलो बस्तीमा पुग्दा स्थानीय पार्वती राना र रूपा रानाको घर जलेका हुन्।
आगलागीबाट पार्वतीको दुईकोठे र रूपाको दुईकोठे घर पूर्ण रूपमा क्षति भएको जिल्ला प्रहरी कार्यालय, गोरखाका प्रहरी नायब उपरीक्षक रमेशकुमार श्रेष्ठले जानकारी दिए। सोही ठाउँका पूर्णबहादुर मगरको गोठ पनि जलेको उनले बताए।
पालुङटार नगरपालिका-९, चालिसेडाँडामा आगलागीबाट तीन वटा गोठमा क्षति पुगेको छ। गोठमा बाँधेको एउटा गाई पनि मरेको छ।
-1732261651.jpg)
-1732259528.jpg)
