आईसीसी वरीयतामा दीपेन्द्रको छलाङ
एकै ओभरमा ६ छक्का प्रहार गरेर चर्चा कमाएका दीपेन्द्रसिंह ऐरीले आईसीसी टी-२० वरीयतामा पनि छलाङ लगाएका छन्।
आईसीसीले बुधबार जारी गरेको नयाँ वरीयतामा ऐरी अलराउन्डरतर्फ एकै पटक १४ स्थानमाथि उक्लिएका छन्। उनी ११औं स्थानमा पुगेका हुन्।
ओमनमा जारी एसीसी टी-२० प्रिमियर कपमा उनले एकै ओभरमा ६ छक्का प्रहार गरेका थिए। टी-२० मा एकै ओभरमा ६ छक्का हान्ने उनी तेस्रो खेलाडी हुन्। यसअघि भारतका युवराज सिंह र वेस्ट इन्डिजका किरन पोलार्डले एकै ओभरमा ६ छक्का प्रहार गरेका थिए।
यो प्रदर्शनसँगै उनले आईसीसी वरीयतामा छलाङ मारेका हुन्। टी-२० अलराउन्डर वरीयताको शीर्षस्थानमा बाङ्लादेशका सकिब अल हसन छन्।
त्यस्तै, टी-२० ब्याटिङमा पनि उनले सुधार गरेका छन्। एकै पटक १६ स्थान उक्लिँदै ब्याटिङको ६२औं स्थानमा पुगेका छन्।
ब्याटिङमा आसिफ शेखले पनि छलाङ मारेका छन्। उनी ३६ स्थान सुधार गर्दै ७२औं स्थानमा पुगेका छन्।
कुशल मल्लको पनि वरीयतामा सुधार भएको छ। नौ स्थान सुधार गर्दै उनी १००औं स्थानमा पुगेका छन्।
-1732180391.jpg)
-1732099242.jpg)
