सहकारी ठगीको अभियोगपत्रमा रवि लामिछानेबारे के छ?

बुटवलको सुप्रिम सहकारीमा भएको ठगी विरुद्ध रुपन्देही जिल्ला अदालतमा मुद्दा परेको छ।

सहकारीमा बचत गरेको रकम फिर्ता नपाई ठगिएका एक हजार ८३१ जनाको जाहेरीपछि प्रहरीले अनुसन्धान टुंग्याएर सरकारी वकील कार्यालयले फौजदारी अभियोगपत्र दायर गरेको हो। सुप्रिम सहकारीका संस्थापक जीबी राई, पूर्व उपराष्ट्रपति नन्दबहादुर पुनका छोरा दिपेशकुमार पुन सहित २८ जना विरुद्ध मुद्दा चलाइएको छ। तर सहकारीबाट ऋण लिएका गृहमन्त्री रवि लामिछानेलाई प्रतिवादी बनाइएको छैन।

यद्यपि प्रहरीको अनुसन्धानमा सुप्रिम सहकारीको ठगी प्रकरणमा रवि लामिछाने पनि जोडिएको देखिन्छ।

अभियोगपत्रमा लामिछानेबारे के उल्लेख छ?

मुद्दाको अनुसन्धान गरेको प्रहरीले गृहमन्त्री लामिछानेले सहकारीबाट ऋण लिएको उल्लेख गरेको छ। गोर्खा मिडिया नेटवर्कको नाममा २०७८ पुस ७ गते शेयर सदस्य जीबी राईले रु.१० करोड २० लाख र रवि लामिछानेले रु.एक करोड ८० लाख लिएका थिए। लामिछाने र राई गोर्खा मिडिया ग्रूप (ग्यालेक्सी टेलिभिजन) मा व्यापारिक साझेदार थिए।

सहकारीबाट रकम लिएर राई अध्यक्ष रहेको गोर्खा मिडिया ग्रूपले सञ्चालन गरेको ग्यालेक्सी फोरके टेलिभिजनमा लामिछाने प्रबन्ध निर्देशक थिए। सुप्रिम सहकारीबाट गोर्खा मिडिया नेटवर्कमा लगिएको कुल रु.१३ करोड ६ लाख अहिलेसम्म तिरिएको छैन। सहकारीबाट गोर्खा मिडियाले रकम लिंदा गोर्खा मिडियामा जीबी राईको १० लाख २० हजार कित्ता र रवि लामिछानेको एक लाख ८० हजार कित्ता शेयर थियो। तर उनको संलग्नताबारे विवाद भए पनि उक्त मिडियाको सम्पूर्ण जिम्मेवारीबाट बिदा लिइसकेको लामिछानेले सार्वजनिक गरेका थिए।

यस्तै, अभियोगपत्रमा लामिछानेको नाममा सहकारीबाट व्यक्तिगत कर्जा समेत प्रवाह भएको उल्लेख छ। उनका नाममा रु.दुई करोडको ऋण खडा गरी गोर्खा मिडियाको नाममा रहेको ग्लोबल आईएमई ब्यांकको खातामा रकम हालिएको उल्लेख छ। अभियोगपत्रमा भनिएको छ, ‘रवि लामिछानेका नाममा (रु.दुई करोडको) ऋण खडा गरी २०७७ चैत १२ गते ग्लोबल आइएमई ब्यांकको खातामा रकम जम्मा गरेको देखिएको छ।’

रु.दुई करोड ऋण बापत रु.चार लाख सेवाशुल्क कट्टा गरेर रु.एक करोड ९६ लाख जम्मा गरिएको पत्रमा उल्लेख छ। प्रहरी अनुसन्धानले सहकारीका सदस्य रवि लामिछानेको नाममा ऋण प्रवाह हुँदा प्रक्रिया पूरा नभएको पनि उल्लेख गरेको छ।

लामिछानेले लिएको रु.दुई करोड ऋण बापतको किस्ता सुप्रिम सहकारीकै बचत रकम प्रयोग गरेर दुई पटक तिरिएको छ। २०७८ असार २२ मा कुमार रम्तेलको नामबाट सुप्रिम सहकारीबाटै रु.एक करोड ९० लाख निकालेर छविलाल जोशीको किस्ता बापत रु.१५ लाख ८० हजार, रवि लामिछानेको कर्जाको किस्ता बापत रु.सात लाख र उनको ऋण बापत रु.५९ लाख ९३ हजार भुक्तान गरेको देखिएको छ।

त्यस्तै, सहकारीकै व्यवस्थापक सागर केसीबाट २०७८ पुस २८ मा रवि लामिछानेको खातामा रु.११ लाख ६७ हजार जम्मा गरेर ऋणको किस्ता तिरिएको छ। यसले लामिछानेको ऋण तिर्न सहकारीकै रकम दोस्रो व्यक्तिलाई ऋणका रूपमा दिएर उक्त रकम प्रयोग भएको बुझाउँछ।

सुप्रिम सहकारीमा करीब १० हजार बचतकर्ताको रु.एक अर्ब ३१ करोड हिनामिना भएको भन्दै प्रहरीमा जाहेरी परेको थियो। यसपछि प्रहरीले बचतकर्ताको जाहेरी दरखास्त, बचत पासबूकहरू, बरामद भएका दस्तावेज, लेखापरीक्षण प्रतिवेदन, ब्यांक तथा वित्तीय संस्थाका कारोबार विवरण, प्रतिवादीहरूको बयानका आधारमा अनुसन्धान टुंग्याएर ठगीको कसूरमा मुद्दा चलाएको हो।

तर यो मुद्दामा सीधै जोडिए पनि गृहमन्त्री लामिछानेलाई छानबिनमा तानिएन। उनी विरुद्ध मुद्दा पनि चलाइएको छैन।