हात्तीको आक्रमणबाट झापामा एक जनाको मृत्यु
झापाको कमल गाउँपालिकामा गएराति हात्तीको आक्रमणमा परी एक जनाको मृत्यु भएको छ।
हात्तीको आक्रमणबाट कमल गाउँपालिका-५, गुह्येश्वरी टोलकी ५८ वर्षीया खड्गमाया लिम्बूको ज्यान गएको वडाध्यक्ष लालबहादुर विष्टले बताए। छिमेकी पवित्रा बेघाको घरमा सुतिरहेका वेला गएराति ११ः५० बजे हात्तीले घर भत्काएको थियो।
घर भत्किएपछि भाग्ने क्रममा हात्तीले आक्रमण गरेको हो। उनको घटनास्थलमा नै मृत्यु भएको वडाध्यक्ष विष्टले बताए।
लिम्बू परिवार केही वर्षदेखि रतुवा माई वृक्षरोपण आयोजनाको जंगल हातामा कटेरो बनाई बस्दै आएको थियो। वर्ष दिनअघि सोही बस्तीमा हात्तीको आक्रमणमा परेर ५८ वर्षीय रोहित रेग्मीको मृत्यु भएको थियो।
जिल्लाको शिवसताक्षीमा तीन दिनअघि हात्तीले आक्रमण गर्दा शिवसताक्षी-११ की ६० वर्षीया पवित्रा भेटवालको मृत्यु भएको थियो। हात्तीको आक्रमणबाट ६२ वर्षीय दिलीप भेटवाल गम्भीर घाइते भएका छन्।
यस वर्ष हात्तीको आक्रमणबाट झापामा सात जनाको मृत्यु भइसकेको छ भने सात जना घाइते भएको डिभिजन वन कार्यालयकी सूचना अधिकारी अञ्जना पुरीले बताइन्।
-1732452683.jpg)
-1732353496.jpg)