ललितपुरमा दुई जनाको हत्या, १८ जना प्रहरीको नियन्त्रणमा
ललितपुर महानगरपालिका-२६ ढोलाहिटीमा गएराति दुई जनाको हत्या भएको छ।
राति ९ बजेतिर दुई समूहबीच झडप हुँदा दुई जनाको ज्यान गएको जिल्ला प्रहरी परिसर, ललितपुरका प्रवक्ता प्रहरी उपरीक्षक नरेशराज सुवेदीले जानकारी दिए। “राति ११ बजे पाटन अस्पतालमा घाइतेलाई ल्याएपछि प्रहरीलाई जानकारी भयो। तत्कालै घटनास्थलमा खटिएर केही व्यक्तिलाई नियन्त्रणमा लिएर सोधपुछ गर्ने काम भइरहेको छ। घटनाको कारण खुल्न सकेको छैन,” उनले भने।
मृत्यु हुनेमा सुनसरीको धरान घर भई हाल ढोलाहिटी बस्ने २८ वर्षीय रोवस राई र पाँचथर जिल्ला घर भई हाल खुमलटार बस्ने ३० वर्षीय पूजन राई रहेको सुवेदीले जानकारी दिए।
मृतकका शव पाटन र सुमेरु अस्पतालमा राखिएका छन्। घटनामा संलग्न भएको आशंकामा प्रहरीले गएराति नै १८ जनालाई नियन्त्रणमा लिएको छ। -रासस
-1732452683.jpg)
