पाटनमा थारू कला प्रदर्शनी

पूर्वदेखि पश्चिमसम्मको थारू समुदायको इतिहास, जीवनपद्धति झल्किने कला प्रदर्शनी पाटनमा शुरू भएको छ।

पाटन संग्रहालयमा शुरू भएको प्रदर्शनीमा थारू समुदायको इतिहास, दिनचर्या, मौलिकता, अन्तरपुस्ताको ज्ञान र सीप झल्काउने कलाकृति राखिएका छन्। ‘डउले डउले’ अर्थात् ‘नमस्ते, तपाईंलाई कस्तो छ?’ शीर्षकमा प्रदर्शनीको नामकरण गरिएको छ। यो चितवनमा बोलिने थारू समुदायको भाषा होे।

थारू समुदायमा अभिवादन गर्ने फरक फरक तरीका छन्। पूर्वी नेपालका थारू समुदायको भाषामा ‘गोर लागैचियै’ तथा पश्चिमी क्षेत्रमा ‘रामरामवा, जय गुरुबाबा’ भनेर अभिवादन गरिन्छ।

tharu art (1).jpg

प्रदर्शनी उद्घाटन समारोहमा बोल्दै डा. सुरेश ढकालले थारू समुदायको इतिहास लेखनका हिसाबले यो प्रदर्शनी महत्त्वपूर्ण रहेको बताए। “मेचीदेखि महाकालीसम्म थारू समुदायमा विविधता छ,” ढकालले भने। भाषा, संस्कृति, खानपान ठाउँ अनुसार फरक फरक भएकाले थारू समुदायलाई जोड्न साझा कुरा खोज्नुपर्नेमा जोड दिए।

थारू समुदायको संस्कृतिलाई उजागर गर्न प्रदर्शनी महत्त्वपूर्ण रहेको पाटन संग्रहालयकी निर्देशक मञ्जु सिंह भण्डारीले बताइन्। “थारू समुदायको संस्कृति, वेशभूषा, कार्यशैली, दैनिक क्रियाकलाप झल्किने कला प्रस्तुत गरिएको छ,” भण्डारीले भनिन्, “यो हेरेपछि थारू समुदायमा पुगे जस्तै महसूस हुन्छ।”

tharu art (3).jpg

थारू सांस्कृतिक संग्रहालय तथा अनुसन्धान केन्द्रले आयोजना गरेको प्रदर्शनीको क्युरेटरमा वीरेन्द्र महतो, लवकान्त चौधरी, सञ्जीव चौधरी, इन्दु थारू, अर्नव चौधरी, मारिया बोसर्ट र टम रोबर्टसन छन्।

प्रदर्शनी आयोजना गर्न थारू एन्ड फ्रेन्ड्स एशोसिएशन यूएसए र फुलब्राइट नेपालले सघाएको छ। प्रदर्शनी चैत १८ गतेसम्म चल्नेछ।

tharu art (4).jpg