लेभिटको शतकमा नेदरल्यान्ड्स ५९ रनले विजयी
त्रिदेशीय टी-२० शृंखलाको तेस्रो खेलमा नेदरल्यान्ड्सले नामिबियालाई ५९ रनले पराजित गरेको छ।
कीर्तिपुरस्थित त्रिवि क्रिकेट मैदानमा बिहीबार भएको खेलमा नेदरल्यान्ड्सले दिएको २४८ रनको लक्ष्य पछ्याउने क्रममा नामिबियाले सात विकेटको क्षतिमा १८८ रन बनाएको हो। नामिबियाका लागि जान फ्रिलिंक र जेन ग्रिनले ४२-४२ तथा जेपी कजले २६, जेजे स्मित र रुबेन ट्रुम्पेलमनले १९-१९ रन बनाए। अन्य खेलाडीले राम्रो प्रदर्शन गर्न सकेनन्।
नेदरल्यान्ड्सका लागि टिम भानले दुई, भिभियन किंमा, फ्रेड क्लासिन, आर्यन दत्त, सिब्रान्ड इंगेलब्रेच र रिलोफ भानले एक-एक विकेट लिए।
यसअघि ब्याटिङ गरेको नेदरल्यान्ड्सले पाँच विकेटको क्षतिमा २४७ रन बनाएको हो। नेदरल्यान्ड्सका लागि मिचेल लेभिटले ६२ बलमा १३५ रन बनाए। जसमा ११ चौका र १० छक्का समावेश छन्। उनले ४९ बलमा शतक बनाएका थिए।
त्यस्तै, सिब्रान्ड इंगेलब्रेचले विस्फोटक अर्धशतक प्रहार गरे। उनले ४० बलमा सात चौका र पाँच छक्काको मद्दतले ७५ रन बनाए। त्यस्तै, तेजा निदामनुरुले तीन बलमा तीन छक्का प्रहार गरे।
नामिबियाका लागि रुबेन ट्रुम्पेलमनले दुई, बेन सिकागो र जान फ्रिलिंकले एक-एक विकेट लिए। अन्य बलर महँगा सावित भए।
यो जितसँगै नेदरल्यान्ड्सको चार अंक भएको छ। दोस्रो स्थानमा रहेको नामिबियाको दुई अंक छ। नेपालले भने अहिलेसम्म अंक जोड्न सकेको छैन। नेपालको खेल शुक्रबार नामिबियासँग हुनेछ।
-1732180391.jpg)
-1732099242.jpg)
