कीर्तिपुरमा नेदरल्यान्ड्सको कीर्तिमानी रन
मिचेल लेभिटले विस्फोटक शतक प्रहार गरेपछि नेदरल्यान्ड्सले कीर्तिपुरस्थित त्रिवि क्रिकेट मैदानमा कीर्तिमानी रन बनाएको छ।
त्रिदेशीय टी-२० शृंखला अन्तर्गत बिहीबार ब्याटिङको निम्तो पाएको नेदरल्यान्ड्सले पाँच विकेटको क्षतिमा २४७ रन बनाएको हो। यो टी-२० मा त्रिवि मैदानमा बनेको उच्च स्कोर हो। त्रिवि मैदानमा चार वर्षअघि नेपालले नेदरल्यान्ड्स विरुद्ध २३८ रन बनाएको थियो।
लेभिटले ६२ बलमा १३५ रन बनाए। जसमा ११ चौका र १० छक्का समावेश छन्। उनले ४९ बलमा शतक बनाएका थिए।
नेदरल्यान्ड्सका लागि सिब्रान्ड इंगेलब्रेचले विस्फोटक अर्धशतक प्रहार गरे। उनले ४० बलमा सात चौका र पाँच छक्काको मद्दतले ७५ रन बनाए। त्यस्तै, तेजा निदामनुरुले तीन बलमा तीन छक्का प्रहार गरे।
नामिबियाका लागि रुबेन ट्रुम्पेलमनले दुई, बेन सिकागो र जान फ्रिलिंकले एक-एक विकेट लिए। अन्य बलर महँगा सावित भए।
त्रिदेशीय शृंखला अन्तर्गत नेपाल, नेदरल्यान्ड्स र नामिबिया प्रतिस्पर्धा गरिरहेका छन्। नेदरल्यान्ड्स र नामिबियाले एक-एक खेल जितेका छन् भने नेपालले दुवैसँग हार बेहोरेको छ।
-1732261651.jpg)
-1732259528.jpg)
