नेपाल नेदरल्यान्ड्ससँग दुई रनले पराजित
त्रिदेशीय टी-२० शृंखलाको दोस्रो खेलमा नेपाल नेदरल्यान्ड्ससँग दुई रनले पराजित भएको छ।
कीर्तिपुरस्थित त्रिवि क्रिकेट मैदानमा बुधबार नेदरल्यान्ड्सले दिएको १८५ रनको लक्ष्य पछ्याउने क्रममा नेपालले आठ विकेटको क्षतिमा १८३ रन बनायो। नेपालका लागि दीपेन्द्रसिंह ऐरी र रोहित पौडेलले अर्धशतक प्रहार गरे पनि जिताउन सकेनन्।
नेपाललाई १५ रन चाहिएको थियो। ऐरीले पहिलो बलमा छक्का र दोस्रो बलमा चौका प्रहार गरे। तेस्रो बलमा दुई रन लिंदा करण केसी रनआउट भए।
त्यसपछि चौथो बलमा अगाडि बढेर शट प्रहार गर्न खोज्दा नेदरल्यान्ड्सका रिलोफ भानले ऐरीलाई बोल्ड गरे। त्यसपछि दुई बलमा चार रन आवश्यक थियो।
नवौं नम्बरमा आएका प्रतिश जीसीले पाँचौं बलमा रन बनाउन सकेनन्। छैटौं बलमा एक रन बन्यो भने नेपाल दुई रनले पराजित भयो।
ऐरीले ३४ बलमा ६ चौका र तीन छक्काको मद्दतले ६३ रन बनाए। त्यस्तै, कप्तान पौडेलले ३६ बलमा ५० रन बनाए।
प्रारम्भिक ब्याटर आसिफ शेखले ३४, कुशल मल्ल र करण केसीले ११-११ रन बनाए। अन्य खेलाडीले दोहोरो अंक पनि जोड्न सकेनन्।
नेदरल्यान्ड्सका लागि रिलोफ भान र सिब्रान्ड इंगेलब्रेचले दुई-दुई तथा भिभियन किंमा, टिम भान र आर्यन दत्तले एक-एक विकेट लिए।
यसअघि ब्याटिङ गरेको नेदरल्यान्ड्सले चार विकेटको क्षतिमा १८४ रन बनाएको थियो। नेदरल्यान्ड्सका लागि मिचेल लेभिटले ५४, सिब्रान्ड इंगेलब्रेचले ४९, स्कट इडवार्डसले ३३ र तेजा निदामनुरुले ३१ रन बनाए।
नेपालका लागि करण केसी र कुशल मल्लले एक-एक विकेट लिए। नेपालका अन्य बलर महँगा सावित भए।
नेपाल लगातार दोस्रो खेलमा पराजित भएको छ। यसअघि मंगलबार भएको खेलमा नामिबियासँग पराजित भएको थियो।
प्रतियोगिता अन्तर्गत तेस्रो खेलमा बिहीबार नामिबिया र नेदरल्यान्ड्सले प्रतिस्पर्धा गर्नेछन्। नेपालले अर्को खेलमा शुक्रबार नामिबियासँग प्रतिस्पर्धा गर्नेछ।
