लिग-२ : नामिबिया १२३ रनमै समेटियो
आईसीसी विश्वकप लिग-२ अन्तर्गत सोमबार भएको खेलमा नेदरल्यान्ड्सका आर्यन दत्तले ६ विकेट लिएपछि नामिबिया १२३ रनमै समेटिएको छ।
कीर्तिपुरस्थित त्रिवि क्रिकेट मैदानमा टस हारेर ब्याटिङको निम्तो पाएको नामिबियाले राम्रो शुरूआत गर्न सकेन। नामिबियाका कुनै पनि खेलाडीले राम्रो प्रदर्शन गर्न सकेनन्।
नामिबियाका लागि जेजे स्मितले २६, रुवेन ट्रम्पेलमनले २०, जेन ग्रिनले १९, निकोलास डेभिन र जेहार्ड जिरसमसले १३-१३ तथा बेर्मान्ड स्कजले १२ रन बनाए। अन्य खेलाडीले दोहोरो अंक पनि बनाउन सकेनन्।
नेदरल्यान्ड्सका लागि आर्यन दत्तले ६ विकेट लिए। उनले नौ ओभरमा ३४ रन खर्चिए। त्यस्तै, केल क्लेइनले दुई, रोफेल भान र म्याक्स उडले एक-एक विकेट लिए।
नेपाल, नेदरल्यान्ड्स र नामिबिया सम्मिलित शृंखलाको यो तेस्रो खेल हो। पहिलो खेलमा नामिबियाले नेपाललाई पराजित गरेको थियो भने दोस्रो खेलमा नेपालले नेदरल्यान्ड्सलाई पराजित गरेको थियो।
चौथो खेल बुधबार हुनेछ। त्यसमा नेपाल र नामिबियाले प्रतिस्पर्धा गर्नेछन्।
-1732261651.jpg)
-1732259528.jpg)