विश्व सामाजिक मञ्चको सम्मेलन काठमाडौंमा प्रारम्भ

विश्व सामाजिक मञ्चको सम्मेलन काठमाडौंमा प्रारम्भ भएको छ।

काठमाडौंको भृकुटीमण्डमा सम्मेलन शुरू भएको हो। ‘अर्को विश्व सम्भव छ’ भन्ने नाराका साथ शुरू भएको सम्मेलनको यो १६औं संस्करण हो।

सम्मेलनको उद्घाटनअघि सांस्कृतिक झाँकी प्रस्तुत गरिएको छ। भृकुटीमण्डपबाट शुरू भएको सांस्कृतिक झाँकी सहितको र्‍याली भद्रकाली, सुन्धारा, रत्नपार्क हुँदै पुनः भृकुटीमण्डपमा पुगेको छ।

दिउँसो साढे १ देखि अपराह्न ४ बजेसम्म उद्घाटन समारोहका सत्र सञ्चालन हुनेछन्। त्यसपछि साँझ पनि सांस्कृतिक कार्यक्रम हुने आयोजकले जनाएको छ।

आजदेखि प्रारम्भ भएको सम्मेलन फागुन ७ गतेसम्म चल्नेछ। सम्मेलनमा १३ वटा मुख्य विधा र त्यसमा आधारित ४०२ वटा उपविधामा छलफल हुनेछ।

सम्मेलनका लागि विभिन्न देशका सामाजिक आन्दोलनमा सहभागी अगुवा, अभियन्ता तथा नागरिक काठमाडौंमा आइपुगेका छन्। उनीहरूले पाँच दिनसम्म वैकल्पिक विश्वबारे विचारविमर्श गर्नेछन्।