आर्मीका लागि विनोद भण्डारीको दोस्रो शतक
प्रधानमन्त्री कप पुरुष राष्ट्रिय क्रिकेट प्रतियोगितामा विनोद भण्डारीले दोस्रो शतक प्रहार गरेका छन्।
कीर्तिपुरस्थित त्रिवि क्रिकेट मैदानमा आइतबार कर्णाली प्रदेश विरुद्धको खेलमा त्रिभुवन आर्मी क्लबका कप्तान भण्डारीले शतक प्रहार गरेका हुन्। उनले १३२ बलमा ६ चौका र तीन छक्काको मद्दतले शतक पूरा गरेका छन्।
यसअघि उनले मधेश प्रदेश विरुद्धको खेलमा शतक प्रहार गरेका थिए। त्यति वेला ९३ बलमा ११३ रन बनाएका थिए। योसँगै प्रतियोगितामा उनको ३२८ रन पुगेको छ।
त्रिभुवन आर्मी क्लबको यो सातौं खेल हो। यस प्रतियोगितामा आर्मी क्लबले अझै दुई खेल खेल्न बाँकी छ।
भण्डारीको शतकसँगै आर्मी क्लबले कर्णाली प्रदेशलाई २८० रनको लक्ष्य दिएको छ। आर्मीका लागि बसीर अहमदले ९८ रन बनाए। उनले ९२ बलमा १२ चौका एक छक्का प्रहार गरे।
कर्णालीका लागि दीपेन्द्र रावतले दुई, प्रकाश जैसी, दिनेश अधिकारी र दिवान पुनले एक–एक विकेट लिए। कर्णाली प्रदेश फाइनलको दौडबाट बाहिरिइसकेको छ भने आर्मीलाई जित्नैपर्ने दबाब छ।
-1732180391.jpg)
-1732099242.jpg)
