विद्यार्थी आकर्षित गर्न परिवारको निःशुल्क स्वास्थ्य बीमा
स्याङ्जाको चापाकोट नगरपालिकाले सामुदायिक विद्यालयमा अध्ययनरत बालबालिकाका परिवारको निःशुल्क स्वास्थ्य बीमा गर्ने भएको छ।
पछिल्लो समय सामुदायिक विद्यालयमा विद्यार्थीको सङ्ख्या घट्दै गएकाले अभिभावक र विद्यार्थीलाई आकर्षित गर्न निःशुल्क स्वास्थ्य बीमाको अवधारणा अघि बढाइएको चापाकोट नगरपालिकाका मेयर देवबहादुर खाणले बताए। नगरभित्रका सबै सामुदायिक विद्यालयमा अध्ययनरत गरीब, अतिविपन्न तथा जेहेन्दार विद्यार्थीका परिवारको निःशुल्क स्वास्थ्य बीमा गरिदिने प्रस्ताव अनुमोदन गरिएको खाणले बताए।
आफ्ना बालबालिकालाई पढाउन बजार जाने वा सुविधा भएका ठूला शहर जाने प्रवृत्तिका कारण पछिल्लो समय गाउँ खाली हुँदै गइरहेकाले पनि यसको रोकथामका लागि निःशुल्क स्वास्थ्य बीमा कार्यक्रमले भूमिका खेल्ने उनको भनाइ छ। “बालबालिकालाई सामुदायिक विद्यालयमा पठाउने अभिभावक वा घरपरिवारको निःशुल्क स्वास्थ्य बीमा गरिदिँदा उपचारमा सहयोग पुग्छ,” मेयर खाणले भने, “सामुदायिक विद्यालयप्रति अभिभावक तथा विद्यार्थीको आकर्षण बढ्दै जान्छ।”
नगरपालिकाले यसका लागि कार्यविधि बनाएर कार्यान्वयन गर्ने तयारी गरेको छ। कार्यक्रमले सर्वसाधारणको स्वास्थ्यमा पहुँच पुग्नुका साथै सामुदायिक विद्यालयले प्रदान गर्ने शिक्षालाई गुणस्तरीय बनाउनका लागि पनि पालिकाले आवश्यक नीति, कार्यविधि तथा बजेटको सुनिश्चित गरेको उनले बताए।
नगरपालिकाभित्र ४५ सामुदायिक विद्यालयमा अध्ययनरत गरीब, अतिविपन्न तथा जेहेन्दार बालबालिकाका परिवारका सदस्यका लागि न्यूनतम तीन हजार ५०० बीमाबापतको रकम नगरपालिकाले भुक्तानी गर्न लागेको हो। यो रकमले पाँच जनासम्मको परिवारले एक वर्षको अवधिसम्म एक लाख रुपैयाँ बराबरको उपचार खर्च गर्न पाउनेछन्। पाँचभन्दा बढी जनाको सङ्ख्या भए पालिकाले प्रतिव्यक्ति ७०० रुपैयाँ थप गरिदिने भएको छ।
शिक्षा शाखा प्रमुख बन्दना गुरुङका अनुसार चापाकोट नगरपालिकामा माध्यमिक तहका १६ र आधारभूत तहमा २९ विद्यालय रहेका छन्। हाल नगरका १० वडामा रहेका ४५ सामुदायिक विद्यालयमा करीब पाँच हजार विद्यार्थी अध्ययनरत छन्। (रासस)
-1732261651.jpg)
-1732259528.jpg)
