संयुक्त उम्मेदवारी दिने गठबन्धनको निर्णय, कसलाई कति सीट?

सत्तारूढ गठबन्धनमा रहेका दलहरूले राष्ट्रिय सभाको निर्वाचनमा संयुक्त उम्मेदवार उठाउने भएका छन्।

प्रधानमन्त्री निवास बालुवाटारमा आइतबार बिहान बसेको गठबन्धनमा रहेका दलहरूको बैठकले संयुक्त उम्मेदवारी दिने निर्णय गरेको नेपाली कांग्रेस नेता रमेश लेखकले बताए। “सरकारमा सहभागी र सरकारलाई समर्थन गरिरहेका सबै दलले संयुक्त उम्मेदवारी दिने निर्णय भएको छ,” नेता लेखकले भने।

गठबन्धनको बैठकले राष्ट्रिय सभा निर्वाचनमा सीट पनि बाँडफाँड गरेको छ। नेता लेखकका अनुसार कांग्रेसलाई १०, नेकपा (माओवादी केन्द्र)लाई ६, नेकपा (एकीकृत समाजवादी)लाई दुई र जनता समाजवादी पार्टी (जसपा)लाई एक सीट दिने सहमति भएको छ।

बैठकपछि नेता लेखकले भने, “सीट बाँडफाँडमा सहमति भइसकेको छ, अब आआफ्नो दलमा छलफल गरेर क्लस्टर टुंगो लगाउँछौं।” केही सीटमा क्लस्टर पनि टुंगो लागेको उनको भनाइ थियो।

आउँदो माघ ११ गते राष्ट्रिय सभाका १९ सीटका लागि निर्वाचन हुँदै छ। त्यसका लागि सोमबार उम्मेदवारी दर्ता गर्ने समय तोकिएको छ।