सन्दीप लामिछाने विरुद्धको मुद्दा आज पनि ‘हेर्दाहेर्दै’ मा
क्रिकेटर सन्दीप लामिछाने विरुद्धको बलात्कारको आरोप सम्बन्धी मुद्दा आज पनि ‘हेर्दाहेर्दै’ मा परेको छ।
जिल्ला अदालत, काठमाडौंमा अन्तिम सुनुवाइ चलिरहेको यो मुद्दा न्यायाधीश शिशिरराज ढकालको इजलासमा पेशी तोकिएको थियो। आज पनि सुनुवाइ नसकिएपछि ‘हेर्दाहेर्दै’ मा राख्ने आदेश भएको छ।
यसअघि आइतबार न्यायाधीश ढकालको इजलासमा पेशी तोकिएको थियो। सुनुवाइ नसकिएपछि ‘हेर्दाहेर्दै’ मा राख्न आदेश भएको थियो।
सोमबार र मंगलबार सरकारी बिदा थियो। जसले गर्दा यो मुद्दामाथि आज सुनुवाइ भएको हो।
यसअघि पटक पटक स्थगन र कागजात झिकाउने आदेश हुँदै आएका थिए। यो मुद्दा अहिलेसम्म ३४ पटक पेशी चढिसकेको छ। यसमाथि बिहीबार सुनुवाइ हुनेछ।
२०७९ भदौमा लामिछाने विरुद्ध नाबालिका बलात्कारको आरोप लागेको थियो। क्रिकेट खेल्न अफ्रिकी मुलुक पुगेका सन्दीप प्रहरीमा जाहेरी परेको सार्वजनिक भएपछि राष्ट्रिय टोलीसँगै नफर्की भागेर अमेरिका पुगेका थिए। इन्टरपोल मार्फत पक्राउ पर्ने सूचना जारी भएपछि उनले नेपाल फर्किएर आत्मसमर्पण गरेका थिए।
जिल्ला अदालतले पुर्पक्षका लागि थुनामा पठाए पनि उच्च अदालतले उनलाई छोडिदिएको थियो। उच्चको आदेशलाई समेत सर्वोच्चले सदर गरिदिएपछि लामिछाने थुना बाहिरै बसेर मुद्दा लडिरहेका छन्।
यस मुद्दामा सर्वोच्च अदालतले ‘फास्ट ट्र्याक’ बाट छिनोफानो गर्न आदेश दिएको थियो। तर एक वर्ष बितिसक्दा पनि मुद्दा टुंगोमा पुगेको छैन।
-1732180391.jpg)
-1732099242.jpg)