शेयर रोक्का अवधि सकिनु एक महीनाअघि नै जानकारी गराउन निर्देशन
नेपाल धितोपत्र बोर्डले पूँजीबजारमा कारोबार हुने शेयर रोक्का अवधि (लक इन पिरियड) सकिनु एक महीना अगावै जानकारी गराउन निर्देशन दिएको छ।
बोर्डले सोमबार नेपाल स्टक एक्सचेन्ज लिमिटेड (नेप्से), सीडीएस एन्ड क्लीयरिङ लिमिटेड र नेप्सेमा सूचीकृत सबै संगठित संस्थालाई पत्र पठाउँदै यस्तो निर्देशन दिएको बोर्डका उपकार्यकारी निर्देशक अम्बिकाप्रसाद गिरीले जानकारी दिए।
नेप्सेमा सूचीकृत संस्थाका संस्थापक तथा स्थानीय प्रभावित शेयरधनीले निश्चित अवधिपछि मात्रै दोस्रो बजारमा शेयर कारोबार गर्न पाउँछन्। यसरी कारोबार रोक्का हुने अवधिलाई ‘लक इन पिरियड’ भनिन्छ। बोर्डको सोमबारको निर्देशन अनुसार अब ‘लक इन पिरियड’ खुल्नु एक महीना अगावै त्यसको जानकारी दिनुपर्नेछ।
“सम्पूर्ण सूचीकृत संगठित संस्थाले संस्थापक समूह तथा अन्य समूहको शेयर बिक्री गर्न नपाइने गरी तोकिएको ‘लक इन पिरियड’ समाप्त हुनुभन्दा कम्तीमा ३० दिन अगाडि लगानीकर्ता एवं सम्बन्धित सबै सरोकारवालालाई जानकारी गराउनुपर्नेछ,” बोर्डको निर्देशनमा भनिएको छ।
‘लक इन’ सम्बन्धी व्यवस्थालाई प्रभावकारी रूपमा कार्यान्वयन गर्न र सर्वसाधारण लगानीकर्तालाई समेत त्यसको जानकारी हुने व्यवस्था गर्न आवश्यक देखिएकाले यस्तो निर्देशन दिइएको बोर्डले जनाएको छ। संगठित संस्थाले ‘लक इन पिरियड’ खुल्ने अवधिबारे धितोपत्र बोर्ड, नेपाल स्टक एक्सचेन्ज र सीडीएस एन्ड क्लीयरिङ लिमिटेडलाई जानकारी दिनुपर्नेछ। -रासस
-1732180391.jpg)
-1732099242.jpg)
