‘पेट्रोलियम अन्वेषणले समृद्ध नेपालको दीर्घकालीन लक्ष्य प्राप्त हुन्छ’
नेकपा (एमाले)का अध्यक्ष केपी शर्मा ओलीले दैलेखको पेट्रोलियम अन्वेषणले समृद्ध नेपालको दीर्घकालीन लक्ष्य प्राप्त हुने बताएका छन्।
एमालेले सञ्चालन गरेको ‘झुलाघाट चिवाभन्ज्याङ, समृद्धिका लागि संकल्प यात्रा’ अभियान अन्तर्गत कर्णाली प्रदेशको दैलेख पुगेका अध्यक्ष ओलीले सोमबार भैरवी गाउँपालिका-१ स्थित श्रीस्थान ज्वाला क्षेत्रको स्थलगत अवलोकनका क्रममा पेट्रोलियम पदार्थको उत्खननमा जोड दिएका हुन्। मुलुकको समृद्धिका लागि पेट्रोलियम पदार्थ अन्वेषणको विकल्प नभएकाले उत्खननमा तीव्रता दिन आग्रह गरे।
“दैलेख पुरातात्त्विक महत्त्व भएको जिल्ला मात्रै होइन, पेट्रोलियम पदार्थको राम्रो सम्भावना भएको जिल्ला पनि हो,” अध्यक्ष ओलीले भने, “यसको थप खोज, अध्ययन र अनुसन्धानको काम अघि बढ्नुपर्छ भनेर अन्वेषणको कामका लागि टोली खटाएका थियौं।” उनले अन्वेषण विभागको टोलीसँगको ब्रिफिङपछि देशलाई समृद्धिको मार्गमा ल्याउन पेट्रोलियम पदार्थको उत्खननले ठूलो भूमिका खेल्ने बताए।
खानी तथा भूगर्भ विभागका अन्वेषण परियोजना प्रमुख दिनेशकुमार नापितले चिनियाँ अन्वेषण टोलीले पेट्रोलियम पदार्थको राम्रो सम्भावना भएको निचोड निकालेको बताए। “उत्खनन टोलीको प्रतिवेदन अनुसार पहिलो तीन हजार ५०० देखि चार हजार मिटरसम्म पेट्रोलियम पदार्थको सम्भावना देखिएको छ। चार हजार ५०० मिटरसम्म पनि यसको सम्भावना निकै राम्रो देखिन्छ,” नापितले भने।
दैलेखको भूभागमा पेट्रोल र ग्यासको भण्डारणको सम्भावनाको अध्ययनका लागि २०७६ असोजदेखि अन्वेषणको काम शुरू गरिएको थियो। नेपाल र चीन सरकारबीच भएको सम्झौता अनुसार दैलेखमा सिस्मिक सर्भे, जियोलोजिकल सर्भे, म्याग्नेटो टेल्युरिक सर्भे र जिओकेमिकल स्याम्पलिङ सर्भे सम्पन्न गरिएको थियो।
-1732261651.jpg)
-1732259528.jpg)